Тошкентда ёнғинни ўчириш вақтида ФВВ қутқарувчиси ҳалок бўлди

Фавқулодда вазиятлар вазирлиги маълум қилишича, хабар олиниши билан шаҳар ФВББ ва ФВВ Махсус қутқарув батальёни қутқарувчилари воқеа жойига етиб бориб, ёнғинни бартараф этишга киришган.

Қутқарувчилар ёнғинни ўчириш билан бир қаторда, хонадонда бўлган аҳолини хавфсиз ҳудудга эвакуация қилиб, уларнинг ҳаётини сақлаб қолган.

Қутқарув ишларида ФВВ Махсус қутқарув батальёни отряд командирининг ўринбосари — гуруҳ командири, капитан Бобурмирзо Пардаев ҳам иштирок этган. У инсонларни қутқаришда жасорат кўрсатган. Бироқ ёнғинни бартараф этиш жараёнида капитан Пардаев қаҳрамонларча ҳалок бўлган.

Вазирлик таъкидлашича, Бобурмирзо Пардаев ўз касбининг ҳақиқий фидойиси сифатида инсон ҳаёти ва хавфсизлигини ўз жонидан устун қўйиб, сўнгги нафасига қадар хизмат бурчига содиқ қолган.