Тошкент метросида аёллар учун алоҳида вагонлар жорий этилиши мумкин

Тошкент метросида аёллар ва эркаклар учун алоҳида вагонлар ташкил этилиши масаласи яна кун тартибига чиқди. Бу ташаббус ҳозирча амалий қарорга айланмаган бўлса-да, метро маъмурияти келгусида янги йўналишлар қуриш ва ҳаракат таркибини янгилашда уни инобатга олиш эҳтимолини истисно қилмаяпти.

Тошкент метрополитени раҳбарияти вакили Юлдаш Юсупов 3 ноябрь куни ОАВ вакиллари билан учрашувда мазкур масалага муносабат билдирди. Унинг айтишича, алоҳида вагонлар ташкил этиш бўйича таклифлар метро маъмуриятига ижтимоий тармоқлар ва фуқаролар мурожаатлари орқали келиб тушмоқда.

Бироқ бу ташаббусни ҳозирги шароитда амалга ошириш учун зарур имкониятлар мавжуд эмас. Бунга йўловчилар оқимининг хусусиятлари ва метрополитеннинг техник имкониятлари тўсқинлик қилмоқда.

Юсуповнинг маълум қилишича, пойтахт метроси йўловчиларининг ўртача 40 фоизини аёллар ташкил этади. Шу сабабли вагонларни жинс бўйича ажратиш масаласи транспорт тизимини режалаштиришда қўшимча ечимларни талаб қилади.

Хавфсизлик масаласи ҳам кун тартибида

Метро вакили алоҳида вагонлар нафақат йўловчилар учун муқобил танлов, балки жамоат транспортида аёлларга нисбатан ноўрин хатти-ҳаракатлар ва тегажоғлик ҳолатларини камайтириш воситаларидан бири бўлиши мумкинлигини таъкидлади.

Бу амалиёт халқаро транспорт тизими учун янгилик эмас. Ҳиндистон, Япония, Миср, Бразилия, Эрон ва Бирлашган Араб Амирликлари каби мамлакатларда аёллар учун махсус вагонлардан фойдаланилади. Айрим давлатларда улар доимий ишласа, бошқаларида фақат тирбандлик кучаядиган вақтларда ёки белгиланган кунларда ҳаракатланади.

Шу билан бирга, масаланинг бошқа томони ҳам бор. Зўравонликка қарши фаолият юритувчи Nemolchi.uz лойиҳаси асосчиси Ирина Матвиенко фикрича, алоҳида вагонлар айрим аёлларда хавфсизлик ҳиссини кучайтириши мумкин. Аммо узоқ муддатли натижага эришиш учун транспортда хавфсизликни таъминлашга қаратилган тизимли чоралар зарур.

Ҳозирча аниқ муддат йўқ

Метро раҳбариятининг билдиришича, аёллар учун махсус вагонлар ажратиш масаласи янги метро участкаларини қуриш ва янги поезд таркибларини харид қилиш жараёнида кўриб чиқилиши мумкин.

Демак, ҳозирча амалдаги йўналишларда вагонларни ажратиш бўйича қарор ҳам, уни жорий этиш муддати ҳам белгиланмаган. Ташаббуснинг келажаги пойтахт метрополитенининг техник янгиланиши ва йўловчилар эҳтиёжларини ҳисобга олган ҳолда қабул қилинадиган қарорларга боғлиқ.

Муаллиф: Ҳасанбой ОЧУН