Туркияда ўзбекистонлик аёл боши узилган ҳолда топилди

Туркияда Ўзбекистон фуқароси бўлган аёлнинг ўлими билан боғлиқ ҳолат юзасидан гумонланувчилар аниқланиб, қўлга олинди.

Маълумотларга кўра, жасад 24 январь  куни маҳаллий вақт билан соат 19:40 атрофида чиқиндилар жойлашган ҳудуддан топилган. Орадан қисқа вақт ўтиб, марҳуманинг шахси аниқланган. У 37 ёшли Ўзбекистон фуқароси Дурдона Ҳакимова экани маълум бўлди.

Тергoв доирасида ушбу жиноятни содир этишда гумон қилинаётган шахс сифатида марҳуманинг ватандоши — Дилшод Турдимуротов аниқланган. Шунингдек, унга жиноятни содир этишда ёрдам берганликда Ғофуржон Камолхўжаев гумон қилинмоқда.

Гумонланувчи Дилшод Турдимуротовнинг кўрсатмасига кўра, у марҳума билан ўша куни танишиб қолган ва у билан жинсий муносабатда бўлган. Шундан сўнг аёлни ўлдирган. Айни пайтда ушбу маълумотлар тергов органлари томонидан текширилмоқда.

Маълум қилинишича, гумонланувчилар Туркияда қурилиш соҳасида ишлаб келган. Улар ҳодисадан сўнг Грузияга чиқиб кетишга уринган вақтда қўлга олинган.

Ҳозирда мазкур ҳолат юзасидан Туркия ҳуқуқ-тартибот идоралари томонидан тергов ҳаракатлари олиб борилмоқда. Қўшимча маълумотлар тергов жараёни якунларига кўра тақдим этилиши кутилмоқда.