Юрист огоҳлантиради: кўпчилик уй харидида айнан шартномада “тузоқ”лар борлигини пайқамайди

Юрист томонидан ўрганилган навбатдаги шартномада ҳам харидор учун жиддий хатарлар қайд этилган. Қуйида уларнинг асосийларини келтирамиз.

1. Нархнинг кафолатланмагани — энг катта таваккал

Шартномада қурилиш материаллари ёки энергия нархи ўзгарса, ёхуд техинвентаризацияда майдон “кўпроқ чиқса”, компания нархни ошириши мумкинлиги ёзилган.
 Бу харидорни кейинчалик 10–20 млн эмас, балки 50–100 млн сўмгача қўшимча харажат қилишга мажбур қилиши мумкин.

2. Қурилиш муддати чекланмаган — компания деярли жавобгар эмас

Қурилиш кечикса, компания турли сабабларни асос қилиб муддатни осон узайтира олади.
 Харидор эса квартира учун бир неча йил қўшимча кутишга мажбур бўлиши мумкин.

3. Тўлов кечикса — оғир жарималар, компания бекор қилса — жавобгарлик йўқ

Шартномаларда аксар ҳолатда:

• ҳар куни учун 0,5% пеня,
• икки ой кечикса, компания шартномани бир томонлама бекор қилиши,
• пулингизни 10–30% камайтириб қайтариши каби бандлар бор.

Бироқ компаниянинг ўзи шартномани бузса,
 деярли ҳеч қандай жавобгарлик кўзда тутилмаган.

4. Камчилик бўлса ҳам хонани қабул қилишга мажбур қилиш

Шартнома бўйича харидор 10 кун ичида хонадонни қабул қилиб олиши шарт.
У ерда камчиликлар бўлса ҳам, қурилиш ҳали тугалланмаган бўлса ҳам:
 акс ҳолда “айб харидорда” деб ёзилган.

5. Пул қандай ишлатилаётгани устидан назорат йўқ

Шартномада компания пулларни “ҳеч қандай чекловсиз” ишлатиши мумкинлиги қайд этилган.
Бу маблағнинг бошқа лойиҳаларга йўналтирилиб, айнан сиз танлаган объектда қурилиш тўхтаб қолиши хавфини кучайтиради.

Хулоса: уй олишда асосий хавф — квартира эмас, ШАРТНОМА

Юрист таъкидлашича, кўпчилик уйнинг қавати, рақами ёки квадрат метрига эътибор қилади, аммо шартнома бандлари энг муҳим жойдир.

Чиройли макетлар, ишончли реклама ва ширин ваъдалар — ҳеч бири шартномадаги биргина банд қўйган хавфни қопламайди.

Мутахассис тавсияси:

• Имзо қўйишдан олдин ҳар бир сатрни онг билан ўқинг,
• Нимага рози бўлаётганингизни аниқ тушуниб олинг,
• Иложи бўлса, ҳужжатни мутахассис юристга кўрсатинг,
• Шошилманг — уй олиш катта ва узоқ муддатли мажбурият.

“Уй деворлари сизга ҳимоя бўлиши учун, шартнома ҳам сизга ҳимоя бўлиши керак”, дейди мутахассис.