Интернетда Турдимов номидан сохта хабарлар тарқатилмоқда

Таълим ва илм-фан вазирлиги Эркинжон Турдимов номидан Телеграм орқали фуқароларга сохта хабарлар юборилаётгани ҳақида огоҳлантирди. Вазирлик ушбу хабарлар ҳақиқатга мос эмаслигини билдирган.

Ижтимоий тармоқларда Ўзбекистон Республикаси Бош вазирининг биринчи ўринбосари – таълим ва илм-фан вазири Эркинжон Турдимов номидан фуқароларга сохта хабарлар юборилаётгани аниқланди.

Хусусан, Телеграм орқали вазирликда олимлар фаолияти юзасидан ички текширув ўтказилаётгани, шу муносабат билан фуқаролар билан Давлат хавфсизлик хизмати майори боғланиши ҳақида асоссиз хабарлар тарқатилмоқда.

Вазирлик Эркинжон Турдимов номидан юборилаётган мазкур хабарлар ҳақиқий эмаслигини билдирди.

Фуқаролардан бу каби шубҳали хабарларга нисбатан эҳтиёткор бўлишлари ва қуйидагиларга амал қилиш сўралди:

• Номаълум аккаунтлардан келган хабарларга ишониб, шахсий маълумотларни тақдим этманг;
• Паспорт маълумотлари, SMS-кодлар ва бошқа махфий маълумотларни учинчи шахсларга берманг;
• Шубҳали хабарларни бошқаларга тарқатманг;
• Вазирлик фаолиятига оид маълумотларни фақат расмий манбалар орқали текширинг.