Бухорода чегарадан катта миқдорда пул ўтказмоқчи бўлган шахс ушланди

Қайд этилишича, ходимлар томонидан божхонадан ўтмоқчи бўлган, ўзини шубҳали тутган фуқаро текширилган. Божхона ходимининг оғзаки сўровида фуқаронинг ёнида 5 000 АҚШ доллари ҳамда 38 млн сўм миқдорда миллий валюта борлигини айтиб, уни ходимларга кўрсатган. Бироқ бу сумма қайта ҳисоб китоб қилинган вақтда 10 000 АҚШ доллари, миллий валюталар эса 38 млн сўм эмас балки, 61 580 000 сўм эканлиги аниқланган. 

Шу жараёнда мазкур хатти-ҳаракатлари билан ўзида шубҳа туғдирган шахс бошқатдан текширилади ва навбатдаги текширувда унинг оёқ кийми остидан 30 минг АҚШ доллари чиқади. Бундан ташқари, кийимининг ён чўнтагидан ҳам 10 минг АҚШ доллари топилган. 

Ҳолат юзасидан юқоридаги шахсга нисбатан тегишли тартибда ҳужжатлар расмийлаштирилган. Яширинча постдан ўтказилиши режалаштирилган жами 50 минг АҚШ доллари ва 61 580 000 сўм миқдордаги миллий валюталар ҳолатга ойдинлик киритилгунга қадар вақтинча сақловга олинган. 

Маълумот учун, Ўзбекистонда жисмоний шахслар томонидан эквиваленти 100 000 000 (юз миллион) сўмгача бўлган нақд валюта маблағларини ихтиёрий тарзда йўловчи божхона декларациясига кўрсатиб, Ўзбекистон Республикасидан олиб чиқишга рухсат этилган. Бироқ мазкур меъёрдан ортиқча бўлган пул маблағларини олиб чиқиш учун эса, тегишли рухсатнома олиниши лозим.