Зеленский Трамп билан учрашди

«Бугун жуда яхши учрашув бўлади деб ўйлайман», — деди Доналд Трамп Зеленскийни қароргоҳ олдида кутиб олар экан. АҚШ президенти журналистлар саволларига жавоб бериб, хавфсизлик бўйича келишув бўлишини, аммо унда аниқ нима ёзилиши ҳозирча номаълумлигини айтди.

 «Бу жиддий келишув бўлади», — дея таъкидлади у.
Трампнинг сўзларига кўра, Россия президенти ҳам, Украина президенти ҳам тинчликка эришишни истамоқда. «Биз музокараларнинг якуний босқичидамиз. Бу жараён яқин орада якунланиши ёки узоққа чўзилиши мумкин», — деди у.

Шунингдек, Трамп музокаралардан сўнг Владимир Путин билан яна телефон орқали гаплашишини маълум қилди. Кремль ҳам Россия ва АҚШ президентлари ўртасида телефон мулоқоти бўлганини тасдиқлади. Россия президенти ёрдамчиси Юрий Ушаковнинг айтишича, Путин суҳбат давомида жанговор ҳаракатларни тўлиқ тўхтатиш учун Киевдан Донбасс бўйича сиёсий қарор талаб этилишини билдирган.

Зеленский эса Мар-а-Лагодаги учрашув олдидан АҚШ томони билан Украинага оид ҳудудий масалаларни муҳокама қилишини айтди. Учрашув бошланиши арафасида Доналд Трамп журналистлардан зални тарк этишни сўраб, музокаралар ёпиқ форматда ўтишига ишора қилди.