18 nafar bokschimiz qitʼa birinchiligining yarim finalida jang qiladi

Tailand mamlakati mezbonlik qilayotgan boks boʻyicha Osiyo chempionatining U19 yosh toifasidagi qizlar oʻrtasida 4 nafar hamyurtimiz yarim final yoʻllanmasini qoʻlga kiritdi.

Chempionatning  -75 kg vaznida boʻlib oʻtgan chorak final jangida Maftuna Yangiyeva Janubiy Koreya vakili Mina Jungni ikkinchi raundda texnik nokautga uchratgan boʻlsa, Rayhona Qurbonboyeva vazni -70 kilogrammgacha boʻlgan bokschi qizlar oʻrtasidagi 1/4 final bosqichida Xitoy Taypeyi sharafini himoya qilgan Chun-Ai Kaoga hech qanday imkon qoldirmadi. Shuningdek, oʻz vazn toifalarida Sevara Mamatova hamda Maftuna Musurmonova yarim finalga chiqdi. 

Bugun, 6 avgust kuni Osiyo chempionatida 22 yoshgacha boʻlgan 18 nafar bokschimiz final ostonasida jang qiladi. Qayd etish lozimki, ushbu bosqichga U22 jamoamiz yoʻqotishlarsiz, toʻliq tarkib bilan yetib keldi.