Afgʻoniston Amudaryo havzasidan koʻproq neft qazib olmoqchi

Afgʻoniston kon va neft vazirligi matbuot kotibi Hamdulloh Fitrat bugungi kunda Amudaryo havzasidagi konda 24 ta faol quduq borligini, mazkur quduqlardan kuniga 1300 tonna neft qazib olinayotganini bildirgan.

"Hozirda bizda 13,5 tonnaga yaqinneft qazib oluvchi 24 ta faol quduq bor. Mamlakatimizning Kon va neft vazirligi joriy yil oxirigacha yana 25 ta quduqni ishga tushirishni rejalashtirmoqda. Shundan 18 tasi yangidan quriladi, razvedka quduqlarining 5 tasi qayta tiklanadi", deydi vazirlik matbuot kotibi.

Mahalliy ekspertlar hukumat mutasaddilari aniq va oʻlchovli reja asosida yangi quduqlarda burgʻilash ishlarini olib borishini, qazib olingan neftni qayta ishlash uchun investorlarni jalb etish kerakligini taʼkidlagan.

"Afgʻoniston potensial jihatdan tabiiy resurslarga boy, ammo afsuski, bizda bu resurslarni qayta ishlash uchun zamonaviy texnika yoʻq. Qayta ishlash uskunalarini import qilish boʻyicha boshqa davlatlar bilan hamkorlik qilish zarur", deydi iqtisodchi Abdul Zahur Madaber.

Boshqa bir ekspert esa Afgʻoniston hukumatining ushbu rejasi mamlakatdagi inflyatsiyani yaxshilashi mumkinligini aytgan.

"Tabiiy resurslarni ishlab chiqarish hamda qayta ishlash mamlakatdagi fuqarolar uchun yangi ish oʻrinlarini yaratish va Afgʻonistonda inflyatsiyani pasaytirishga ijobiy taʼsir koʻrsatishi mumkin", deydi Muhammad Asif Stanekzay.

Maʼlumot uchun, Afgʻoniston Kon va neft vazirligining statistik maʼlumotlarida bugungi kunda mamlakatning neftga boʻlgan ehtiyojining atigi 10 foizi ichki manbalar hisobidan qondiriladi.