Pokiston–Afgʻoniston chegarasida navbatdagi toʻqnashuvlar: Koʻrammda otishmalar qayta avj oldi, qurbonlar bor

Reuters  maʼlumotlariga koʻra, Afgʻoniston «Tolibon» hukumati vakillari 15 oktabr kuni Pokiston tomonidan amalga oshirilgan hujumlar oqibatida kamida 12 nafar fuqaro halok boʻlgani, taxminan 100 kishi yaralanganini aytdi. 

Eskalatsiya qachon va qanday boshlandi?

12 oktabr kuni ikki mamlakat chegarasidagi bir nechta oʻtkazish punktlarida ogʻir toʻqnashuvlar boʻlib oʻtdi. Har ikki tomon bir-birini keng koʻlamli zarar yetkazishda aybladi: Afgʻoniston 58 nafar pokistonlik askar halok boʻlganini aytdi, Pokiston esa 200 dan ortiq «Tolibon» va bogʻliq jangchilar yoʻq qilinganini maʼlum qildi. Bu raqamlar mustaqil manbalar tomonidan tasdiqlanmagan. Shu kunlardan boshlab chegara oʻtish nuqtalari vaqtincha yopildi va savdo harakati toʻxtadi. 

12–15 oktabr orasida oʻq uzish toʻxtab-qaytdi, ammo 15 oktabrda Koʻramm yoʻnalishida otishmalar yana davom etdi. Pokiston OAVlari Qoʻshinlar «Shamshod post» kabi obʼektlarga zarbalar yoʻllagani va TTPga tegishli oʻquv bazasi yoʻq qilinganini qayd etdi. 

Pokistonning daʼvosiga koʻra, Afgʻoniston hukumati TTP guruhlariga panoh berib kelmoqda. «Tolibon» hukumati esa Pokistonni havo makonini buzish, mamlakatning ichki hududlariga zarbalar berishda ayblab, oʻsha harakatlarga «javab zarbalari» qilganini taʼkidlaydi; chegara hududlarida fuqarolar orasida qurbonlar borligi aytilmoqda. 

Ayni paytda koʻplab chegara oʻtish punktlari yopilgani sababli ikki tomonlama savdo va tranzit vaqtincha toʻxtab qoldi. Hududda harbiy hushyorlik oshirilgan; yangi toʻqnashuvlar xavfi saqlanib turibdi.