Aliment qarzdorlarini ommaviy eʼlon qilish amaliyoti inson huquqlariga zid — Ombudsman

Ijtimoiy tarmoqlarda Jizzax viloyatida aliment boʻyicha qarzdor shaxslar roʻyxatlari mahalla Telegram guruhlariga tarqatilayotgani, shuningdek ularning fotosuratlari mahalla binolari va masjid hududlariga ilib qoʻyilayotgani haqidagi xabarlar keng muhokamaga sabab boʻlmoqda.

Taʼkidlash joizki, Oʻzbekiston Respublikasi Konstitutsiyasining 26-moddasiga muvofiq, insonning shaʼni va qadr-qimmati daxlsizdir va hech narsa uni kamsitish uchun asos boʻla olmaydi.

Shuningdek, Jinoyat kodeksining 7-moddasiga koʻra, jazo va boshqa huquqiy taʼsir choralari jismoniy azob berish yoki inson qadr-qimmatini kamsitish maqsadini koʻzlamaydi.

Aliment toʻlash — ota-onaning qonuniy majburiyati va bolaning daxlsiz huquqidir. Bolaning taʼminot olish huquqi davlat himoyasida boʻlib, uni taʼminlash boʻyicha choralar qonun doirasida qatʼiy amalga oshirilishi lozim.

Biroq qarzdorlarni ommaviy ravishda sharmanda qilish, shaxsiy maʼlumotlarini tarqatish yoki fotosuratlarini jamoat joylariga ilib qoʻyish kabi amaliyotlar huquqiy davlat tamoyillariga zid boʻlib, inson qadr-qimmatini kamsitishga olib keladi.

Inson qadri — har qanday ijro harakatlaridan ustundir.