Mashina jarimaga, ota qamoqqa joylashdi

Namangan viloyatida aliment qarzdorligi boʻyicha qidiruvda boʻlgan shaxs yoʻl harakati qoidalarini ham muntazam buzib kelganligi aniqlandi.

Bosh prokuratura huzuridagi Majburiy ijro byurosi viloyat boshqarmasi qidiruv shoʻʼbasi xodimlari va viloyat IIB yoʻl harakati xavfsizligi xizmati inspektorlari bilan hamkorlikda oʻtkazilgan navbatdagi reyd davomida ushlangan ushbu shaxs yillar davomida aliment toʻlovlarini amalga oshirmagan. Bundan tashqari, u boshqaruvida boʻlgan avtotransport vositasiga 15 marta qoidalarni buzganligi uchun jarimalar qoʻllanilgan, biroq uni ham toʻlashdan qochib yurgan.

MIB Namangan viloyat boshqarmasi inspektori Jobir Qodirovning maʼlumotiga koʻra, tadbir davomida transport vositasi jarima maydonchasiga, alimentdan qarzi bor haydovchi esa byuro organiga olib kelindi. Qarzdorga nisbatan farzandi moddiy taʼminotidan boʻyin tovlagani uchun sud tomonidan 15 sutka maʼmuriy qamoq jazosi belgilandi.