Xorazmda keksa otasini moddiy taʼminlamagan farzandlar jinoiy jazoga tortildi

Xorazmda keksa otasini moddiy taʼminlamagan uch farzandga oid jinoyat ishlari sudda koʻrib chiqildi. Kun.uz sud hukmlari bilan tanishdi.

Sud hujjatlarida keltirilishicha, Bogʻot tumanida yashovchi, 5 farzandning otasi boʻlgan X.X. keksayganida qarovsiz qolgan. U 2023 yil iyul oyida fuqarolik ishlari boʻyicha Shovot tuman sudiga farzandlaridan aliment toʻlovlari undirish haqida ariza bilan murojaat qilgan. Sud qarori bilan otaxonning moddiy taʼminoti uchun farzandlarining har biridan oylik 130 ming soʻm qatʼiy summada toʻlov undirish belgilangan. Ammo bir oʻgʻli va ikki qizi ushbu aliment toʻlovini toʻlamay kelgan.

X.X. sudda turmush oʻrtogʻi vafotidan soʻng farzandlari uni yolgʻiz tashlab qoʻyganini bildirgan.

“Oʻzlarining farzandlik burchlarini bajarmadi. Axir ularni tugʻilganidan voyaga yetgunlariga qadar parvarishlab, tarbiyalab kelganman. Biroq shunday boʻlishiga qaramasdan, meni keksaygan va sogʻligʻim yomonlashgan bir davrda oʻz holimga tashlab qoʻyishdi”, degan otaxon sudda.

X.X.ning uch farzandi belgilangan alimentni toʻlashdan boʻyin tovlab kelgan. Ular 2024 yil sentabr oyida maʼmuriy jazoga tortilgan. Ammo moddiy yordamga muhtoj boʻlgan otasiga aliment toʻlashdan boʻyin tovlashda davom etishgan. 2023 yil iyuldan 2025 yil 1 iyungacha boʻlgan davrda ularning har birida 2 mln 721 ming soʻmdan toʻlanmagan aliment qarzdorligi yuzaga kelgan.

Ota suddan ushbu qarzdorlikni undirishda amaliy yordam soʻragan. Jinoyat ishlari boʻyicha Bogʻot tuman sudi hukmlariga asosan farzandlar Jinoyat kodeksining 123-moddasi (ota-onani moddiy taʼminlashdan boʻyin tovlash) 1-qismida nazarda tutilgan jinoyatni sodir qilishda aybli deb topilgan. Oʻgʻil farzand oylik ish haqining 20 foizi miqdorini davlat daromadiga ushlab qolgan holda 2 yil muddatga axloq tuzatish ishlari jazosiga tortilgan. Ikki qiz farzandning har biriga esa Jinoyat kodeksining 57-moddasini qoʻllagan holda BHMning 20 baravari, yaʼni 7,5 mln soʻmdan jarima jazosi tayinlangan.

Maʼlumot uchun, Jinoyat kodeksining 123-moddasiga koʻra, voyaga yetgan shaxslarning mehnatga layoqatsiz va moddiy yordamga muhtoj boʻlgan ota-onani yoki ularning oʻrnini bosuvchi shaxslarni moddiy taʼminlashdan boʻyin tovlashi, yaʼni ularni moddiy jihatdan taʼminlash uchun sudning hal qiluv qaroriga binoan undirilishi lozim boʻlgan mablagʻni jami boʻlib ikki oydan ortiq muddat mobaynida toʻlamasligi shunday qilmish uchun maʼmuriy jazo qoʻllanganidan keyin sodir etilgan boʻlsa, 3 yilgacha axloq tuzatish ishlari yoki 1 yilgacha ozodlikdan mahrum qilish bilan jazolanadi. Agar shaxs aliment majburiyatlari boʻyicha qarzdorlikni toʻliq toʻlagan boʻlsa, u javobgarlikdan ozod qilinadi.