Toshkentda ota 2,4 mlrd soʻmlik alimentni toʻlab berdi

MIB axborot xizmatining xabar berishicha, sudning buyrugʻiga asosan qarzdor Sh.J. dan undiruvchi Sh.D. foydasiga voyaga yetmagan 4 nafar farzandi taʼminoti uchun ½ qismi miqdorida aliment undirish haqidagi ijro hujjati Byuroning Uchtepa tuman boʻlimiga kelib tushgan boʻlib, Qonunining 23-moddasiga asosan ijro ishi yuritishni qoʻzgʻatish toʻgʻrisida qaror qabul qilingan.

Shuningdek, qarzdorning nomiga rasmiylashtirilgan mol-mulklarni aniqlash maqsadida vakolatli organlarga soʻrovnomalar yuborilgan hamda olingan javob xatlarga koʻra, qarzdorning nomiga rasmiylashtirilgan mol-mulklari aniqlanmagan.

Oʻtkazilgan ijro harakatlar davomida, qarzdor Sh.J. voyaga yetmagan 4 nafar farzandi taʼminoti uchun to ular voyaga yetguniga qadar oldindan aliment miqdorini hisoblab berishni soʻrab ariza bilan murojaat qilgan.

Shunga koʻra, aliment miqdori qarzdorning ish haqi va boshqa daromadlarining 50 foizi miqdorida 2025 yil 1 avgustdan 2041 yil 1 aprelga qadar (16 yillik) hisoblanganda, jami 2 mlrd 442 mln 482 ming 580 soʻm etib hisob-kitob qilingan.

Olib borilgan ijro harakatlar davomida, qarzdor Sh.J. tomonidan yuqorida koʻrsatilgan summa miqdoridagi aliment puli uy koʻrinishida undiruvchi Sh.D.ga toʻlab berildi hamda undiruvchining roziligiga asosan ijro hujjati amalda tamomlandi.