Antikorrupsiya agentligi 2025 yilda olingan sovgʻalar roʻyxatini oshkor qilmadi

Oʻzbekiston Korrupsiyaga qarshi kurash agentligi idora vakillari tomonidan 2025 yilda olingan sovgʻalar boʻyicha maʼlumot taqdim etish haqidagi soʻrovga javob bermadi. Mazkur soʻrov Zamonaviy jurnalistikani rivojlantirish markazi tomonidan 17 noyabr kuni Agentlikka yuborilgan.

«Ommaviy axborot vositalari toʻgʻrisida»gi qonunga muvofiq, davlat organlari OAV soʻrovlariga 7 kun ichida javob berishlari shart.

Markaz tomonidan quyidagi savollarga javob soʻralgan edi:

1. 2025 yilda Agentlik vakillari tomonidan olingan sovgʻalar roʻyxatini taqdim etish;
2. Agentlik tomonidan boshqa vazirlik va davlat organlarida olingan sovgʻalar boʻyicha markazlashgan monitoring olib borilishi haqida maʼlumot berish.

Maʼlumot oʻrnida, 2023 yil 13 mart kuni davlat fuqarolik xizmatchilari xizmat safari, xalqaro va boshqa rasmiy tadbirlar doirasida olishi mumkin boʻlgan sovgʻalar qiymati hamda ularni tasarruf etish tartibini belgilaydigan nizom tasdiqlangan. Ushbu hujjat davlat organlarida sovgʻalar reyestrlarini yuritishni nazarda tutsa-da, ularni ommaviy oshkor etish talabini belgilamaydi.

2023 yilda olingan sovgʻalar

2023 yilda olingan sakkizta esdalik sovgʻasi va devoriy suratlarning umumiy qiymati 14,57 million soʻmni tashkil etgan. Eng qimmat sovgʻa Misr Maʼmuriy nazorat boshqarmasi rahbaridan olingan haykalcha boʻlib, uning qiymati 3,2 million soʻmga teng.

Shuningdek, Tojikiston, Qozogʻiston, Ozarbayjon, Qirgʻiziston va Afgʻonistonning korrupsiyaga qarshi kurash idoralari tomonidan taqdim etilgan qiymati 1,35 million soʻmdan 2,5 million soʻmgacha boʻlgan esdalik sovgʻalar reyestrda qayd etilgan.

2024 yilda olingan sovgʻalar

2024 yilda Agentlik rasmiy hamkorlariga umumiy qiymati 14 million soʻmdan ortiq sovgʻalar topshirgan. Shu bilan birga, Agentlik xodimlari tomonidan olingan va reyestrda aks ettirilgan sovgʻalarning umumiy qiymati 32 million soʻmdan oshgan.

Reyestr maʼlumotlariga koʻra, eng faol hamkor davlatlar sifatida Qatar (davlat auditi organlari, prokuratura va sud tizimi), Malayziya (korrupsiyaga qarshi kurash idoralari, akademiyalar va NNTlar), shuningdek Tojikiston va Qozogʻiston qayd etilgan. Bu 2024 yilda rasmiy sovgʻalar almashinuvi boʻyicha qaysi davlatlar bilan aloqalar eng jadal boʻlganini koʻrsatadi.

Nizomga koʻra, agar davlat organi xodimiga berilgan sovgʻa qiymati bazaviy hisoblash miqdorining toʻrt baravaridan (1,6 million soʻm) kam boʻlsa, u xodim ixtiyorida qoladi. Agar ushbu meʼyordan oshsa, sovgʻa davlat organi balansiga oʻtkazilib, idora ehtiyojlari uchun foydalanilishi mumkin.