AQSh hukumati 36 kundan beri ishlamayapti

1 oktabrdan beri davom etayotgan hukumat faoliyatining toʻxtashi (shutdown) AQSh tarixidagi eng uzoq davom etgan byudjet inqiroziga aylandi. BBC xabariga koʻra, bu holat 2019 yilda Donald Tramp davridagi 34 kunlik rekordni ham ortda qoldirdi.

Demokratlar past daromadli aholi uchun tibbiy sugʻurta subsidiyalarini uzaytirishni talab qilmoqda, respublikachilar esa bu tashabbusni byudjet uchun ortiqcha xarajat deb baholamoqda.

Shatdaun natijasida oziq-ovqat yordam dasturi (SNAP) qisqartirilib, millionlab past daromadli fuqarolar vaqtincha subsidiya va kuponlarsiz qolgan. Sud dasturni vaqtincha davom ettirishga buyruq bergan boʻlsa-da, Donald Tramp bu qarorga norozilik bildirgan.

AQSh Transport kotibi maʼlum qilishicha, 13 mingga yaqin havo harakati dispetcheri maosh olmasdan ishlamoqda. Agar inqiroz uzoq davom etsa, parvozlar kechikishi yoki bekor qilinishi, ayrim aeroportlar faoliyati qisqarishi mumkin.

Mutaxassislar fikricha, uzoq davom etayotgan shatdaun AQSh iqtisodiyotiga har kuni milliardlab dollar zarar yetkazmoqda. Agar yaqin vaqt ichida kelishuvga erishilmasa, mamlakatda iqtisodiy beqarorlik kuchayishi mumkin.