АҚШ ҳукумати 36 кундан бери ишламаяпти

1 октябрдан бери давом этаётган ҳукумат фаолиятининг тўхташи (shutdown) АҚШ тарихидаги энг узоқ давом этган бюджет инқирозига айланди. BBC хабарига кўра, бу ҳолат 2019 йилда Доналд Трамп давридаги 34 кунлик рекордни ҳам ортда қолдирди.

Демократлар паст даромадли аҳоли учун тиббий суғурта субсидияларини узайтиришни талаб қилмоқда, республикачилар эса бу ташаббусни бюджет учун ортиқча харажат деб баҳоламоқда.

Шатдаун натижасида озиқ-овқат ёрдам дастури (SNAP) қисқартирилиб, миллионлаб паст даромадли фуқаролар вақтинча субсидия ва купонларсиз қолган. Суд дастурни вақтинча давом эттиришга буйруқ берган бўлса-да, Доналд Трамп бу қарорга норозилик билдирган.

АҚШ Транспорт котиби маълум қилишича, 13 мингга яқин ҳаво ҳаракати диспетчери маош олмасдан ишламоқда. Агар инқироз узоқ давом этса, парвозлар кечикиши ёки бекор қилиниши, айрим аэропортлар фаолияти қисқариши мумкин.

Мутахассислар фикрича, узоқ давом этаётган шатдаун АҚШ иқтисодиётига ҳар куни миллиардлаб доллар зарар етказмоқда. Агар яқин вақт ичида келишувга эришилмаса, мамлакатда иқтисодий беқарорлик кучайиши мумкин.