AQSh Venesuelada nomaʼlum «sirli qurol» qoʻlladi — guvohlar dahshatli manzarani tasvirladi

Bu haqda Venesuela xavfsizlik kuchlari safida xizmat qilgan shaxsning guvohligiga tayanib, AQSh Oq uyi matbuot kotibi X ijtimoiy tarmogʻida xabar tarqatdi.

Guvohning aytishicha, operatsiya vaqtida AQSh maxsus boʻlinmalari birorta ham yoʻqotishsiz yuzlab venesuelalik harbiylarni yoʻq qilgan. Uning soʻzlariga koʻra, jang paytida qoʻllangan nomaʼlum qurol taʼsirida askarlar burnidan qon ketib, baʼzilari qon qusa boshlagan, koʻpchiligi esa harakatlana olmay, yerga yiqilgan.

Guvoh hodisalarni shunday tasvirlaydi: navbatchilik vaqtida toʻsatdan barcha radar tizimlari ishdan chiqqan, osmonda koʻplab dronlar paydo boʻlgan. Qisqa vaqt ichida taxminan sakkizta vertolyot hududga qoʻnib, 20 nafarga yaqin AQSh maxsus boʻlinmasi aʼzolarini tushirgan.

Uning taʼkidlashicha, bu harbiylar oddiy qurollar bilan emas, yuqori texnologik vositalar bilan jihozlangan boʻlgan. «Biz ilgari bunday raqibni koʻrmaganmiz. Bu urush emas, toʻliq qirgʻin edi», — deydi u.

Eng dahshatli pallada, guvohning aytishicha, AQSh harbiylari nomaʼlum qurolni ishga tushirgan. U qurolni «juda kuchli tovush toʻlqiniga oʻxshash taʼsir» deb taʼriflaydi. Shu zahoti askarlarda kuchli bosh ogʻrigʻi, qon ketishi va umumiy falaj holati kuzatilgan.

«Hammamiz bir vaqtda burnimizdan qon keta boshladi. Ayrimlar qon qusdi. Yerga yiqildik, turishning iloji yoʻq edi», — deydi guvoh.

Sobiq AQSh razvedka manbasiga koʻra, bu qurol yoʻnaltirilgan energiya quroli — mikrotoʻlqin yoki lazer texnologiyasi asosida ishlovchi tizim boʻlishi mumkin. Bunday qurollar inson organizmiga kuchli taʼsir oʻtkazib, qon ketishi, harakat qobiliyatini yoʻqotish, ogʻriq va ichki jarohatlarga olib kelishi mumkin. Manba taʼkidlashicha, AQSh bunday texnologiyalarga oʻnlab yillardan beri ega, ammo bu ularning ilk bor ochiq harbiy operatsiyada qoʻllanishi boʻlishi mumkin.

Venesuela Ichki ishlar vazirligining rasmiy maʼlumotiga koʻra, 2026 yil 3 yanvar kuni boʻlib oʻtgan hujumda taxminan 100 nafar xavfsizlik xodimi halok boʻlgan. Ularning qay darajada nomaʼlum qurol taʼsirida oʻlgani hozircha aniq emas.

Reyddan keyin guvoh bu voqealar nafaqat Venesuela, balki butun Lotin Amerikasi uchun jiddiy signal boʻlganini taʼkidladi. Uning soʻzlariga koʻra, AQSh bilan toʻqnashish haqida oʻylayotgan har qanday kuch bu voqealardan xulosa chiqarishi kerak.

«Men koʻrganlarimdan keyin, hech qachon AQShga qarshi boʻlishni istamayman. Ular nimaga qodir ekanini hech kim tasavvur qilmaydi», — dedi u.