Bangladesh Bosh vaziri mamlakatdan qochib ketdi

76 yoshli ayol dushanba kuni vertolyotda Hindistonga qochib ketgan, minglab namoyishchilar uning poytaxt Dakkadagi rasmiy qarorgohiga bostirib kirishi natijasida 2009-yildan beri hokimiyatda boʻlgan avtokrat raxbarning hukmronligiga yakun yasaldi.

Hasina xonim oʻz siyosiy faoliyatini demokratiya tarafdori sifatida boshlagan edi. Biroq, soʻnggi yillarda u avtokratga aylanib, oʻz hukmronligiga qarshi chiqqan har qanday harakatlarni yoʻq qilgan. Uning hukmronligi davrida siyosiy sabablarga koʻra hibsga olishlar, gʻoyib boʻlishlar, suddan tashqari oʻldirishlar va boshqa huquqbuzarliklar koʻpaygan.

Yanvar oyida boʻlib oʻtgan saylovlarda u toʻrtinchi muddatga Bosh vazir sifatida saylanib misli koʻrilmagan gʻalaba qozondi. Saylov tanqidchilar tomonidan soxta deb qoralangan va asosiy muxolifat tomonidan boykot qilingan.

Namoyishlar avj olgan pallada mamlakatning sobiq prezidenti, Bosh vazir Shayx Hasinaning otasi Shayx Mujibur Rahmonning haykalini agʻdarishdi.

Namoyishlar iyul oyi boshida barcha davlat ish oʻrinlarining yarmidan koʻpi mustaqillik kurashi qatnashchilarining oila aʼzolariga ajratiladigan kvotalash tizimining qayta joriy etilishi yuzasidan boshlangan edi. Keyinroq tizim Bangladeshning Oliy sudi tomonidan bekor qilindi.

Tartibsizliklarning eng ogʻir davrlarida kuch ishlatar tizimlar 200 dan ortiq odamning oʻlimiga sabab boʻlgan. Bundan tashqari minglab odamlar rezina oʻqlar va koʻzni yoshlantiruvchi granatalardan jarohatlangan.

Qoʻshinlar namoyishchilarning qonini toʻkishi ortidan norozilik qamrovi yanada keng tus oldi.