Бангладеш Бош вазири мамлакатдан қочиб кетди

76 ёшли аёл душанба куни вертолётда Ҳиндистонга қочиб кетган, минглаб намойишчилар унинг пойтахт Даккадаги расмий қароргоҳига бостириб кириши натижасида 2009-йилдан бери ҳокимиятда бўлган автократ рахбарнинг ҳукмронлигига якун ясалди.

Ҳасина хоним ўз сиёсий фаолиятини демократия тарафдори сифатида бошлаган эди. Бироқ, сўнгги йилларда у автократга айланиб, ўз ҳукмронлигига қарши чиққан ҳар қандай ҳаракатларни йўқ қилган. Унинг ҳукмронлиги даврида сиёсий сабабларга кўра ҳибсга олишлар, ғойиб бўлишлар, суддан ташқари ўлдиришлар ва бошқа ҳуқуқбузарликлар кўпайган.

Январ ойида бўлиб ўтган сайловларда у тўртинчи муддатга Бош вазир сифатида сайланиб мисли кўрилмаган ғалаба қозонди. Сайлов танқидчилар томонидан сохта деб қораланган ва асосий мухолифат томонидан бойкот қилинган.

Намойишлар авж олган паллада мамлакатнинг собиқ президенти, Бош вазир Шайх Ҳасинанинг отаси Шайх Мужибур Раҳмоннинг ҳайкалини ағдаришди.

Намойишлар июл ойи бошида барча давлат иш ўринларининг ярмидан кўпи мустақиллик кураши қатнашчиларининг оила аъзоларига ажратиладиган квоталаш тизимининг қайта жорий этилиши юзасидан бошланган эди. Кейинроқ тизим Бангладешнинг Олий суди томонидан бекор қилинди.

Тартибсизликларнинг энг оғир даврларида куч ишлатар тизимлар 200 дан ортиқ одамнинг ўлимига сабаб бўлган. Бундан ташқари минглаб одамлар резина ўқлар ва кўзни ёшлантирувчи гранаталардан жароҳатланган.

Қўшинлар намойишчиларнинг қонини тўкиши ортидан норозилик қамрови янада кенг тус олди.