Bankdan 90 ming dollarni talon-toroj qilganlar qoʻlga olindi – poytaxt IIBB

Joriy yilning 18 iyun kuni Yashnobod tumani Ichki ishlar bosh boshqarmasiga Tenge Bank Chakana xizmatlar koʻrsatish boʻlimi boshligʻi ariza bilan murojaat qilgan. U oʻz arizasida nomaʼlum shaxslar tomonidan 90 ming AQSh dollari miqdoridagi mablagʻ talon-toroj qilingani haqida xabar bergan.

Maʼlum boʻlishicha, bir necha shaxslar bank kassasiga mijoz sifatida tashrif buyurib bank kartasida mavjud 90 ming AQSh dollarini naqdlashtirish maqsadida POS-terminalga yolgʻon axborot kiritish yoʻli bilan 90 ming AQSh dollarini olib ketgan.

Olib borilgan tezkor surishtiruvlar natijasida ushbu harakatni sodir etgan jinoiy guruhning barcha aʼzolari qoʻlga olindi.

Oʻtkazilgan tezkor tadbir davomida 12 dona telefon apparati, postterminal, 9 dona bank kartalari, 1 670 000 soʻm va 36 495 AQSh dollari ashyoviy dalil sifatida olingan. Jami 9 nafar shaxs Jinoiy-protsessual kodeksining 221-moddasi tartibida ushlanib, holat yuzasidan tezkor-qidiruv tadbirlari davom ettirilmoqda.