"Biznesni rivojlantirish banki" jarima toʻlaydigan boʻldi

Qayd etilishicha, mazkur holat Raqobat qoʻmitasi tomonidan oʻtkazilgan monitoringlar natijasida aniqlanilgan. Toshkent shahrida joylashgan reklama monitorlarida, shuningdek internet platformasida "Biznesni rivojlantirish banki" ATB tomonidan taqdim etilgan kreditlar haqidagi maʼlumotlarda qarz shartlari toʻliq va aniq koʻrsatilmagan. 

Jumladan, "Biznesga 1,5 milliard, yillik 17,5 foiz" va "Ot 17 % godovix, ipoteka na kvartiru v novostroyke" kabi mazmundagi reklamalarda kreditning muhim shartlari, foiz stavkalarining aniq sharti, toʻlov muddati va boshqa talablar qayd etilmagan. 

Yuqoridagi holatlar yuzasidan qoʻmita Maxsus komissiyasi tomonidan "Biznesni rivojlantirish banki" ATBga nisbatan "Reklama toʻgʻrisida"gi hamda "Isteʼmolchilarning huquqlarini himoya qilish toʻgʻrisida"gi qonunlarining tegishli moddalari talablari buzilishi yuzasidan ish qoʻzgʻatilib, ishni koʻrib chiqish yakunlari yuzasidan moliyaviy jarima qoʻllash yuzasidan qaror qabul qilingan.

"Shuningdek, qonunbuzilish holatini bartaraf etish va kelgusida yoʻl qoʻymaslik yuzasidan koʻrsatma berildi", deyiladi qoʻmita tomonidan berilgan xabarda.