"Invest Finance Bank" AJ jarimaga tortildi

Qayd etilishicha, qoʻmita tomonidan mazkur bank tekshirilgan. Oʻrganishlar davomida "Invest Finance Bank" AJ Toshkent shahrining bir qator koʻchalarida LED monitorli reklama obʼektlarida "50 million tanishlarsiz, 50 kun foizlarsiz, 5 yilga, taʼtil uchun, taʼmirlash uchun, texnika uchun" kredit olish mazmunidagi reklamani joylagan. 

Ushbu reklama matni boʻyicha bankning rasmiy veb-sayti oʻrganilganda, faqatgina "Infin Black" kredit kartasi uchun 50 million soʻmgacha, 60 oyga, yillik 23,99 foizdan kredit ajratilishi, kartadan naqd pul yechish 2 foiz, kartadan-kartaga pul oʻtkazish 1 foiz, alohida belgilanadigan foiz stavkasi yillik 25,55 foizdan 54,75 foizgacha koʻrsatilgani aniqlangan. Kredit boʻyicha qoʻshimcha shartlar va muhim maʼlumotlar tashqi reklamada koʻrsatilmagan. 

Yuqoridagi holat yuzasidan qoʻmita Maxsus komissiyasi tomonidan "Reklama toʻgʻrisida"gi hamda "Isteʼmolchilarning huquqlarini himoya qilish toʻgʻrisida”gi qonun talablari buzilish alomatlari yuzasidan "Invest Finance Bank" AJga nisbatan belgilangan tartibda ish qoʻzgʻatilib, moliyaviy jarima qoʻllash haqida qaror qabul qilingan.