"BCA": «Oʻzbekistonda yangi investitsiya platformasi ishga tushirildi»

Nashrda taʼkidlanishicha, Shavkat Mirziyoyev tadbirkorlar bilan muloqot chogʻida turli loyihalarga soddalashtirilgan tartibda mablagʻ jalb qilish imkonini beruvchi platforma ishga tushirilganini maʼlum qilgan. 

Endi har qanday kompaniya oʻz loyihasini mazkur platformaga joylashtirishi mumkin, investorlar esa qiziqqan sohalarga investitsiya yoʻnaltirishi mumkin boʻladi.

Jurnal Oʻzbekistondagi jadal rivojlanayotgan startaplar ekotizimiga ham eʼtibor qaratgan. Mamlakatda hozirda 600 dan ortiq startap faoliyat yuritmoqda, ular joriy yilning yetti oyida 264 mln dollar xorijiy investitsiya jalb etdi. Bu koʻrsatkich 2024 yilning shu davriga nisbatan 4 barobar koʻpdir. Prezident 1000 ta startap gʻoyasini tijoratlashtirish, shundan 200 tasini xalqaro bozorga olib chiqish rejasi borligini taʼkidlagan.

Qayd etilishicha, 100 ta mahalliy startapni jahon miqyosidagi kompaniyalarga aylantirish ham koʻzda tutilgan. Shuningdek, raqamli moliyaviy xizmatlarni rivojlantirish maqsadida banklar, moliya kompaniyalari va startaplarni birlashtiruvchi yangi “ochiq banking” ekotizimi joriy etilishi belgilangan.

Jurnalning mazkur sonida, shuningdek, Oʻzbekiston hayotining ijtimoiy-iqtisodiy va madaniy jihatlariga oid maqolalar ham chop etilgan.