Italiya Apple’ga 98,6 million yevro jarima soldi

Antimonopoliya qoʻmitasining yozma bayonotiga koʻra, Apple Inc., Apple Distribution International Ltd. va Apple Italia S.r.l. kompaniyalariga nisbatan jami 98 635 416 yevro jarima qoʻllanilgan.

Bayonotda taʼkidlanishicha, Italiya antimonopol organi Yevropa komissiyasi, boshqa milliy antimonopoliya idoralari hamda Italiya maʼlumotlarni himoya qilish agentligi bilan hamkorlikda oʻtkazilgan keng qamrovli tekshiruv natijasida Apple’ning 2021 yil aprel oyidan boshlab iOS operatsion tizimidagi App Store orqali tarqatiladigan uchinchi tomon ilovalar ishlab chiquvchilariga ilovalarni kuzatish shaffofligi siyosati (ATT)ni majburiy tarzda joriy etganini aniqlagan.

Ushbu qoidalar raqobatni cheklovchi deb baholangan. Qoʻmita fikricha, Apple mazkur bozorda App Store orqali «haddan tashqari dominant» mavqega ega.

Tekshiruv davomida ATT siyosati shartlari Apple tomonidan bir tomonlama tarzda joriy etilgani, bu esa kompaniyaning tijoriy hamkorlari manfaatlariga zarar yetkazishi, shuningdek, maʼlumotlarni himoya qilish boʻyicha eʼlon qilingan maqsadlarga nisbatan nomutanosib ekani aniqlangan.