Tojikistonda folbin va sehrgarlarga borganlik uchun 475 dollargacha jarima joriy etildi

ASIA-Plus nashrining yozishicha, Maʼmuriy huquqbuzarliklar toʻgʻrisidagi kodeksiga 31 iyul kuni bu tuzatishlar kuchga kirgan, biroq bu haqda endigina maʼlum boʻlmoqda.

Nashrning taʼkidlashicha, soʻnggi bir yil ichida Tojikiston rasmiylari folbin va sehrgarlar hamda ularning mijozlariga qarshi kurashni kuchaytirgan.

2024 yilning yozida Tojikiston Ichki ishlar vazirligi folbin va sehrgarlarga borayotgan shaxslar organlar tomonidan chaqirtirilishi, shuningdek, ularning ismlari va fotosuratlarini idoraning maʼlumotlar bazasiga kiritilishi haqida ogohlantirish bergandi.

Oʻshanda mamlakat rasmiylari “bu chora-tadbirning maqsadi xurofot, folbinlar va sehrgarlar xizmatidan foydalanishning oldini olish ekanini, chunki baʼzi fuqarolar ularga murojaat qilib, sehr-jodu va afsungarlikning tarqalishiga hissa qoʻshishini” aytgan, deb yozdi ASIA-Plus.

Shuningdek, Tojikistonda folbinlik va sehrgarlik bilan shugʻullanganlik uchun jazo kuchaytirilgan. Parlament bunday xizmatlar uchun jarimani qariyb 800 dollargacha oshirdi va 10 kundan 15 kungacha maʼmuriy qamoqqa olishni joriy qildi. Agar takroran sodir etilsa, bu kattaroq jarima yoki bir yildan ikki yilgacha ozodlikdan mahrum qilish bilan jazolanadi.

“Gazeta.uz” nashrining yozishicha, bir necha kun avval Tojikiston hukumati nafaqat folbin va sehrgarlarga, balki ularning mijozlariga ham maʼmuriy jazo qoʻllashni taklif qilingan. Jazo esa 81 dollargacha boʻlishi kutilayotgandi. Mamlakatda 2025-yilning ilk 6 oyida sehrgarlik va folbinlik bilan shugʻullanishning 495 ta holati aniqlangan.