Britaniya Oʻzbekistonning toʻrt kompaniyasiga nisbatan sanksiyalar joriy etdi

London mazkur biznes subʼektlarini Rossiya bilan iqtisodiy hamkorlik qilganlikda gumon qilmoqda.

Britaniya Gʻaznachiligi hujjatlariga koʻra, 18 dekabrdan boshlab ushbu kompaniyalarning aktivlari muzlatilib, ularga nisbatan moliyaviy cheklovlar joriy etilgan.

Sanksiyalar roʻyxatiga kiritilgan Oʻzbekiston kompaniyalari quyidagilar:

• Fargʻona kimyo zavodi;
• Gelion Business Trade MChJ (Toshkent);
• Chemistry International MChJ QK (Navoiy);
• Raw Materials Cellulose MChJ (Jizzax).

Britaniya rasmiylariga koʻra, ushbu kompaniyalar Ukraina hududidagi urushda foydalanilishi mumkin boʻlgan tovarlar yoki texnologiyalarni Rossiyaga yetkazib bergan boʻlishi ehtimoli bilan tekshiruv ostiga olingan. Biroq hozircha qoʻshimcha tafsilotlar ochiqlanmagan.

Yangilangan sanksiyalar roʻyxatidan Qirgʻizistonning Bishkek shahrida roʻyxatdan oʻtgan «Kifiko» kompaniyasi ham oʻrin olgan. London ushbu kompaniyani moliya sohasidagi faoliyati orqali Rossiya hukumatini qoʻllab-quvvatlaganlikda ayblamoqda.

Shuningdek, ayrim jismoniy shaxslarga nisbatan ham cheklovlar joriy etildi. Britaniya Gʻaznachiligi maʼlumotlariga koʻra, ushbu roʻyxatda Oʻzbekiston, Isroil va Rossiya fuqaroligiga ega boʻlgan tadbirkor Rustam Moʻminov ham bor. Avvalroq Ukraina ham unga nisbatan sanksiyalar qoʻllagan edi.

Qayd etilishicha, Rustam Moʻminov Fargʻona kimyo zavodiga egalik qiluvchi kompaniya asoschisi hisoblanadi.