Buxoroda chegaradan katta miqdorda pul oʻtkazmoqchi boʻlgan shaxs ushlandi

Qayd etilishicha, xodimlar tomonidan bojxonadan oʻtmoqchi boʻlgan, oʻzini shubhali tutgan fuqaro tekshirilgan. Bojxona xodimining ogʻzaki soʻrovida fuqaroning yonida 5 000 AQSh dollari hamda 38 mln soʻm miqdorda milliy valyuta borligini aytib, uni xodimlarga koʻrsatgan. Biroq bu summa qayta hisob kitob qilingan vaqtda 10 000 AQSh dollari, milliy valyutalar esa 38 mln soʻm emas balki, 61 580 000 soʻm ekanligi aniqlangan. 

Shu jarayonda mazkur xatti-harakatlari bilan oʻzida shubha tugʻdirgan shaxs boshqatdan tekshiriladi va navbatdagi tekshiruvda uning oyoq kiymi ostidan 30 ming AQSh dollari chiqadi. Bundan tashqari, kiyimining yon choʻntagidan ham 10 ming AQSh dollari topilgan. 

Holat yuzasidan yuqoridagi shaxsga nisbatan tegishli tartibda hujjatlar rasmiylashtirilgan. Yashirincha postdan oʻtkazilishi rejalashtirilgan jami 50 ming AQSh dollari va 61 580 000 soʻm miqdordagi milliy valyutalar holatga oydinlik kiritilgunga qadar vaqtincha saqlovga olingan. 

Maʼlumot uchun, Oʻzbekistonda jismoniy shaxslar tomonidan ekvivalenti 100 000 000 (yuz million) soʻmgacha boʻlgan naqd valyuta mablagʻlarini ixtiyoriy tarzda yoʻlovchi bojxona deklaratsiyasiga koʻrsatib, Oʻzbekiston Respublikasidan olib chiqishga ruxsat etilgan. Biroq mazkur meʼyordan ortiqcha boʻlgan pul mablagʻlarini olib chiqish uchun esa, tegishli ruxsatnoma olinishi lozim.