Davolanish uchun imtiyozli yoʻllanma kimlarga va qay tartibda beriladi?

Xoʻsh, kimlar order olishi mumkin? U qanday tartibda beriladi?

 —  2003 yil 26 fevralda qabul qilingan tegishli huquqiy hujjatda davlat byudjeti mablagʻi hisobidan tibbiy yordam koʻrsatiladigan qator imtiyozli toifadagi shaxslar roʻyxati keltirilgan, — deydi Tibbiy yordamni tashkillashtirish departamenti boʻlim boshligʻi Azizbek Hamroqulov. — Bu roʻyxatga bolalikdan nogironligi boʻlgan shaxslar, yetim bolalar, I va II guruh nogironlari, yoshga oid pensiyaga chiqqan va ishlamaydiganlar, 1941–1945 yillardagi urush oqibatida nogiron boʻlgan shaxslar, uning qatnashchilari va ularga tenglashtirilgan shaxslar, baynalmilalchi-jangchilar kiritilgan. 

Ayni chogʻda kam taʼminlangan oilalarning bolalar nafaqasi va moddiy yordam oluvchilari, kambagʻallik reyestriga kiritilgan oilalar aʼzolari, oylik daromadi oilaning har biriga minimal isteʼmol xarajati miqdorining 2 baravaridan koʻp boʻlmagan vakillari va boshqa bir nechta toifadagi shaxslar ham ana shu roʻyxatdan oʻrin olgan.

Koʻrinib turibdiki, bu imtiyozdan foydalanuvchilar soni kam emas. Shu bois order olish tartibini qadam-baqadam keltirsak, ular uchun foydali boʻladi.

Dastlab mijoz yashash joyidagi oilaviy shikofor punktiga yoki poliklinikaga boradi. Bu yerdan u koʻp tarmoqli markaziy poliklinikaga yoʻnaltiriladi. Shu oʻrinda ijtimoiy ahamiyatli kasalliklar bilan dispanser roʻyxatida turadigan shaxslar tegishli viloyat tibbiyot tashkilotlariga toʻgʻridan-toʻgʻri yuborilishi mumkinligini ham eslatib oʻtish zarur.

Koʻp tarmoqli markaziy poliklinika bemorni hududda davolash mumkin, deb bilsa, uni tuman tibbiyot birlashmasi statsionar boʻlimiga yoʻnaltiradi, kasalligiga qarab viloyatga ham joʻnatishi mumkin. Oʻz navbatida, viloyatdan respublika tibbiyot tashkilotiga yoʻllanma beriladi.

Toshkent shahrida fuqaro dastlab oilaviy poliklinikaga boradi. Bu yerdan u koʻp tarmoqli markaziy poliklinikaga yoʻnaltiriladi. Ijtimoiy ahamiyatli kasalliklar boʻyicha dispanser roʻyxatida turadigan bemorlar shahar yoki respublika tibbiyot tashkilotiga toʻgʻridan-toʻgʻri yuborilishi mumkin.

Koʻp tarmoqli markaziy poliklinikadan shaharga va u yerdan respublika tibbiyot tashkilotlariga yoʻllanma beriladi.

Aytish joizki, imtiyozli toifadagi mijozlarga bepul tibbiy yordam koʻrsatish uchun tibbiy tanlov komissiyasi xulosasi asosida order beriladi.

Hozirgidek raqamlashtirish jarayonida odamlar ortiqcha vaqt yoʻqotmaslikni istashi turgan gap. Shu bois bu jarayon raqamlashtirilgan boʻlib, order holatini my.gov.uz portali orqali tekshirish imkoniyati yaratilgan.

Portalning “Imtiyozli davolanishni tekshirish" sahifasiga oʻtib, "Xizmatdan foydalanish" tugmasi bosiladi.

Arizachining turi tanlanadi (Arizachi/Ota-ona/ Ishonchli vakil).

Arizachi shaxsiy maʼlumotlari kiritiladi (JShShIR, yashash joyi).

Imtiyozli yoʻllanma maʼlumotlari joylanadi.

Shu tariqa imtiyozli toifaga kiruvchi shaxs elektron yoʻllanma asosida koʻrsatiladigan tibbiy xizmatlar maʼlumotini ham yuklab oladi.

Umuman, Oʻzbekistonda imtiyozli toifadagi aholini davlat mablagʻi hisobidan order orqali davolash keng yoʻlga qoʻyilgan boʻlib, ushbu jarayonni yanada soddalashtirish doimiy eʼtibor markazida. Shu maqsadda ayni chogʻda tegishli qonunchilikni yanada takomillashtirish boʻyicha ish olib borilyapti. Albatta, bu order olish tartibini yanada osonlashtirish bilan bir qatorda, tibbiyotni xalqchil tizimga aylantirish borasidagi saʼy-harakatlarimizga yangicha surʼat bagʻishlaydi.