Deputatlar shovqin solish taqiqlangan soatlarni uzaytirish koʻzda tutilgan qonunni qabul qildi

7 oktabr kuni Oliy Majlis Qonunchilik deputatlari «Aholini zararli shovqin taʼsiridan himoya qilish toʻgʻrisida»gi qonun loyihasini qayta koʻrib chiqdi. 

Qonun loyihasi bilan fuqarolarning tinchligi va normal dam olishini buzishga yoʻl qoʻyilmaydigan vaqtni amaldagi yetti soatdan (soat 23:00 dan 6:00 gacha) sakkiz soatga (soat 23:00 dan 7:00 gacha), qonunchilikda belgilangan dam olish va ishlanmaydigan bayram kunlarida esa soat 22:00 dan 9:00 gacha oʻzgartirish taklif etilmoqda.

Shuningdek, Fuqarolarning osoyishtalik va normal dam olishini buzishga yoʻl qoʻyilmaydigan vaqt oraligʻida belgilangan meʼyordan ortiq shovqinga yoʻl qoʻyayotgan obʼektlar faoliyatini toʻxtatib turish vakolati belgilanmoqda.

Shovqin taʼsiri natijasida yetkazilgan zarar uchun sud tartibida kompensatsiya undirish boʻyicha norma kiritilmoqda. Shovqinni yoʻl qoʻyiladigan darajasidan yuqori boʻlgan mehnat sharoitlarida ishlarda band boʻlgan xodimlarning mehnatiga haq, qonunchilikka asosan, oshirilgan miqdorda toʻlanishi mustahkamlab qoʻyilmoqda.

Bundan tashqari, shovqin darajasi belgilangan normalardan ortiq boʻlgan transport vositalarni boshqarish uchun javobgarlik kuchaytirilmoqda.

Muhokama yakunida qonun ikkinchi va uchinchi oʻqishda maʼqullanib, Senatga yuborildi.