Erdoʻgʻan: “Turkiya samarali tashqi siyosat orqali dunyodagi mavqeini mustahkamlamoqda”

Turkiya samarali tashqi siyosat tufayli, mintaqada ham, dunyoda ham taʼsirli davlatga aylanish sari ishonch bilan qadam tashlamoqda.

Bu haqda Turkiya prezidenti Rajab Toyyib Erdoʻgʻan Lozanna tinchlik shartnomasi imzolanganining 102 yilligi munosabati bilan qilgan bayonotida maʼlum qildi. Prezident maʼmuriyati huzuridagi Aloqalar boshqarmasi davlat rahbarining murojaatini eʼlon qildi.

Prezident Erdoʻgʻanning taʼkidlashicha, Lozanna shartnomasi turk xalqining mustaqillikka intilishini va bu yoʻldagi kurashini xalqaro huquq normalari doirasida tasdiqlagan va mustahkamlagan.

“Lozanna shartnomasi imzolanganiga 102 yil toʻldi. Mamlakatimiz rivojlanish va farovonlik sari ishonch bilan bormoqda. Tinchlik, hamkorlik va oʻzaro hurmatga asoslangan tashqi siyosat yuritar ekanmiz, mintaqa va dunyoda taʼsirli davlatga aylanmoqdamiz. Bugun biz kechagidan yaxshiroq holatdamiz. Xudo xohlasa, ertaga yanada yuqori bosqichga yetamiz,” — dedi Erdoʻgʻan.