Isroil: Erdoʻgʻan boshchiligidagi Turkiya Isroilga nisbatan diplomatik va iqtisodiy sanksiyalar joriy etdi

Saar Budapeshtda Vengriya tashqi ishlar va tashqi savdo vaziri Peter Siyyarto bilan qoʻshma matbuot anjumani oʻtkazdi. U Mojariston poytaxtiga rasmiy tashrif bilan kelgan edi.

Isroil tashqi ishlar vaziri xalqaro sudda Isroilning Birlashgan Millatlar Tashkiloti (BMT) agentliklariga nisbatan harakatlari koʻrib chiqilganini eslatdi. Unga koʻra, Tel-Aviv hukumati Gʻazodagi BMT agentliklarini qoʻllab-quvvatlash haqida qaror qabul qilgan boʻlsa-da, Isroil BMTning Falastin qochqinlariga yordam koʻrsatish agentligi (BAPOR) bilan hamkorlik qilmasligi va xalqaro sudlar qarorlarini tan olmasligini taʼkidladi.

Saar Turkiyaning Gʻazoda joylashtirilishi mumkin boʻlgan xalqaro harbiy kuchlarda ishtirok etish ehtimoli haqidagi savolga javoban shunday dedi:

«Erdoʻgʻan boshchiligidagi Turkiya Isroilga nisbatan faqat salbiy bayonotlar bilan cheklanib qolmadi, balki diplomatik va iqtisodiy sanksiyalar orqali ham oʻz pozitsiyasini koʻrsatdi».

Vazirning soʻzlariga koʻra, Falastin maʼmuriyati ozod etilgan falastinliklarga toʻlovlar amalga oshirmoqda, Yevropa Ittifoq esa bu harakatlar uchun javobgarlik talab qilish oʻrniga, ularni «oqlaydi» va yordam koʻrsatishda davom etmoqda.

Saar taʼkidlashicha, Isroil armiyasining Gʻazo sektoridagi okkupatsiya qilingan hududlardan chiqishi “HAMASning qurolsizlantirilishiga bogʻliq”. Shundan soʻnggina ular kelishuv doirasida chiqishni amalga oshirishi mumkin.

Shuningdek, u Isroil parlamentida okkupatsiya qilingan Gʻarbiy sohilni anneksiya qilish toʻgʻrisidagi qonun loyihasini muxolifat kiritganini maʼlum qildi. Saarning taʼkidlashicha, mazkur loyiha AQSh vitse-prezidenti Jey Di Vensning Isroilga tashrifi chogʻida muhokamaga kiritilgani “na oqilona, na masʼuliyatli qadam”dir. Hukumat bu tashabbusni qoʻllab-quvvatlamaydi va qonun parlament tomonidan qabul qilinmaydi.

Shu bilan birga, Isroil tadbirkorlari Vengriyaga mamlakat tarixidagi eng yirik savdo delegatsiyasi bilan yetib borgani, ularning venger hamkasblari bilan 150 dan ortiq ishbilarmonlik uchrashuvlari oʻtkazishi rejalashtirilgani maʼlum qilindi.

Xalqaro sud 22 oktabrdagi maslahat xulosasida Isroilning BMT muassasalariga nisbatan cheklovlari xalqaro huquqqa zid ekanini bildirgan. Sudning bayonotiga koʻra, Isroil fuqarolarga insonparvarlik yordamini yetkazish uchun masʼul boʻlib, BMT agentliklari faoliyatini toʻsish yoki cheklash huquqiga ega emas.

Eslatib oʻtamiz, 2024 yil 28 oktabrda Isroil parlamenti BAPORni mamlakat hududida taʼqiqlangan tashkilot deb eʼlon qilgan va shu orqali 1949 yildan buyon amal qilib kelayotgan agentlik faoliyati cheklangan edi.