Donald Tramp: “Erdoʻgʻan juda toʻgʻri ish qildi”

U jumladan shunday dedi:

«Prezident (Rajab Toyyib) Erdoʻgʻan HAMAS va boshqa guruhlar bilan bogʻliq masalalarni shaxsan nazorat qildi va juda toʻgʻri ish qildi».

Oq uydagi hukumat yigʻilishida Tramp Gʻazodagi kelishuv va otashkesim haqida fikr bildirdi.

Prezidentning taʼkidlashicha, Gʻazoda otashkesimning kuchga kirishi Yaqin Sharqdagi tinchlik yoʻlida tarixiy voqea hisoblanadi. U bu kelishuv mintaqada tinchlik olib kelishiga ishonch bildirdi.

Tramp ayniqsa Turkiya, Qatar va Misr davlatlariga bu jarayondagi katta hissasi uchun minnatdorlik izhor etdi:

«Bu ajoyib natijaga erishishda yordam bergani va bizga koʻmaklashgani uchun Turkiya, Qatar va Misr rahbarlariga katta minnatdorlik bildiraman», — dedi u.

Tramp shuningdek, Gʻazodagi «urush»ga barham berilganini taʼkidlab, keng koʻlamli tinchlikka yoʻl ochilganini qoʻshimcha qildi:

«Menimcha, bu tinchlik doimiy boʻladi, umid qilaman, abadiy davom etadi».

Tramp rasmiy kelishuvni imzolash uchun Misrga safar qilishini ham maʼlum qildi. Uning soʻzlariga koʻra, asirlar dushanba yoki seshanba kuni ozod etiladi.