Sunʼiy intellekt loyihalariga 100 million dollar ajratiladi

Prezidentning «Sunʼiy intellekt texnologiyalariga asoslangan loyihalarni qoʻllab-quvvatlashga oid qoʻshimcha chora-tadbirlar toʻgʻrisida»gi qarori (PQ–320-son, 2025 yil 30 oktabr) qabul qilindi.

Qarorni qabul qilishdan asosiy maqsad — ijtimoiy soha va iqtisodiyot tarmoqlarida sunʼiy intellekt texnologiyalariga asoslangan ustuvor va startap loyihalarni moliyalashtirishni kengaytirishdir.

Qarorga muvofiq:
2026–2027 yillarda startap loyihalarni moliyalashtirish uchun Tiklanish va taraqqiyot jamgʻarmasidan qoʻshimcha 100 million AQSh dollari ajratiladi. Ushbu mablagʻ quyidagicha taqsimlanadi:

• 50 million AQSh dollari — davlat organlari va tashkilotlari faoliyatiga sunʼiy intellekt texnologiyalarini joriy etish uchun begʻaraz asosda ajratiladi;
• 50 million AQSh dollari — “Fondlar fondi” va “IT Park Ventures” venchur jamgʻarmalari ustav kapitaliga Tiklanish va taraqqiyot jamgʻarmasi ulushi sifatida kiritiladi. Bu mablagʻ sunʼiy intellekt texnologiyalariga asoslangan loyihalarni qoʻllab-quvvatlashga yoʻnaltiriladi.

Mablagʻlarni taqsimlash “Raqamli Oʻzbekiston – 2030” strategiyasini amalga oshirish boʻyicha muvofiqlashtirish komissiyasi tomonidan amalga oshiriladi.