Fuqarolarni saylovda faol boʻlishga chorlagan Putin Rossiya yadroviy urushga tayyorligi haqida ham gapirdi

"Biz Rossiyaning erkinligi, suvereniteti va xavfsizligini himoya qilish, qadriyatlarimiz, tarix va madaniyatimizni himoya qilish uchun qanchalik yakdilligimizni allaqachon isbotladik... Bugun bu yoʻldan ogʻib ketmaslik, oʻz oldimizga qoʻyilgan ulkan maqsadlarga erishish gʻoyat muhim, saylovda ishtirok etish vatanparvarlik tuygʻularining isbotidir", - dedi. Rossiyada prezidentlik saylovi 2024-yil 17-martda boʻlib oʻtishi belgilangan. Ovoz berish uch kun davom etadi: 15, 16 va 17-mart.

12-mart kuni Putin muxolifatchisi Ilya Ponamaryov «Rossiyaga ozodlik» legioni, «Rossiya koʻngillilar korpusi» va Sibir batalyoni bilan birgalikda qoʻshma amaliyot doirasida Kursk va Belgorod oblastlariga kirgani haqida xabar berilgandi. Ular rossiyaliklarni boʻlib oʻtadigan navbatdagi prezidentlik saylovini inkor etishga chaqirgan.

Ukraina tomonidan Rossiyaga dron hujumlari ortishi fonida Putin yadroviy urush haqida fikr bildirdi.

Jurnalist Dmitriy Kiselevga bergan intervyusida “Biz haqiqatan ham yadro urushiga tayyormizmi?” degan savolga Putin “Harbiy-texnik nuqtai nazardan, biz, albatta, tayyormiz”, deb javob berdi. Bundan tashqari, Rossiya Federatsiyasi Prezidenti Rossiyaning yadroviy triadasi AQShnikidan koʻra zamonaviyroq ekanligini taʼkidladi.