Putin yadroviy kuchlar boshqaruvi boʻyicha rejali mashqlar oʻtkazilganini maʼlum qildi

Kreml matbuot xizmati xabariga koʻra, «Rossiya Federatsiyasi Qurolli Kuchlarining Oliy Bosh qoʻmondoni Vladimir Putin rahbarligida strategik yadroviy kuchlar mashqi oʻtkazildi, unda qurolli kuchlarning yer, dengiz va havo tarkibiy qismlari ishtirok etdi», — deyiladi bayonotda.

Maʼlumotga koʻra, mashqlar davomida qitʼalararo ballistik raketalar va havo bazasidagi qanotli raketalarning amaliy uchirishlari amalga oshirilgan.

Plesetsk davlat kosmodromidan Kamchatkadagi “Kura” poligoniga «Yars» qitʼalararo ballistik raketa uchirilgan. Shuningdek, Barens dengizi akvatoriyasidagi “Bryansk” nomli atom raketa suvosti kemasidan «Sineva» ballistik raketa uchirilgan. Mashqlarda Tu-95MS strategik bombardimonchi samolyotlari ham qatnashib, havo bazasidagi qanotli raketalarni uchirish amaliyotlarini bajargan.

Amaliyotlarning boshqaruvi Rossiya Milliy mudofaa boshqaruv markazidan amalga oshirilgan.

Kreml bayonotida taʼkidlanishicha, mashqlar chogʻida harbiy boshqaruv organlarining tayyorgarlik darajasi hamda qoʻmondonlik tarkibining amaliyotni boshqarish boʻyicha koʻnikmalari tekshirilgan. Barcha vazifalar muvaffaqiyatli bajarilgan.

Rossiya Bosh shtabi boshligʻi Valeriy Gerasimovning aytishicha, mashqlarda «Yars» raketa majmualari, «Bryansk» suvosti kemasi va Tu-95MS samolyotlari ishtirok etgan.

Uning soʻzlariga koʻra, mashqlarda yadroviy qurolni qoʻllash boʻyicha qaror qabul qilish tartibini amalda sinovdan oʻtkazish nazarda tutilgan. Bunda harakatchan «Yars» majmualari, Barens dengizi akvatoriyasidagi “Bryansk” suvosti kemasi va Tu-95MS strategik samolyotlari amaliy harakatlarni bajargan.