Ham aytamiz, ham qaytamiz. Quvilgan amaldorlar hukumatga qaytmoqda

Bugun, 3 sentabr kuni Oʻzbekistonda rasmiy dam olish kuni hisoblanadi. Lekin prezident yigʻilishida "faoliyatida tizimli kamchiliklarga yoʻl qoʻygani" alohida taʼkidlanib, ishdan olingan Nurshod Xudoyberdiyev Namangan viloyati qishloq xoʻjaligi boshqarmasi boshligʻi boʻldi. 

Namangan viloyati Mingbuloq tumanida hokim vazifasida ishlagan Xudoyberdiyev 2024 yilning  17 iyul kunida prezident oʻtkazgan videoselektorda yaxshi ishlamagani uchun qattiq tanqid bilan ishdan olingan edi.

Xudoyberdiyevning 2020 yilda fermerlarni haqoratlab, soʻkib tashlagani yozib olingan audiosi ijtimoiy tarmoqlarga tarqalib, keng muhkamalarga sabab boʻlgandi. Shundan soʻng, unga nisbatan qayd etilgan moddalar bilan bazaviy hisoblash miqdorining yigirma baravari — 4 mln 460 ming soʻm miqdorida jarima jazosi tayinlangan. 

Koʻp holatda prezident yo uning Administratsiyasi qaysidir amaldorni tanqid qilib, nadomatlar bilan ishdan oladi. Lekin bu bir muddatlik, chunki ana shunday shov-shuv bilan ishdan olinib, keyin biroz vaqt oʻtib, hamma unutganda yo boshqa xabar bilan chalgʻiganda birovga indamay boshqa amalga tayinlanadi. 

Ulardan yana biri 2023 yilning 16 yanvar kuni Energetika vazirining sobiq oʻrinbosari Sherzod Xoʻjayev boʻlib, u anomal qish sharoitida energetika inqirozi fonida Toshkent shahri hokimi Jahongir Ortiqxoʻjayev va “Issiqlik elektr stansiyalari” raisi Farhod Abdurahmonov bilan bir qatorda ishdan olingan edi.

 Lekin oradan bir oy oʻtar-oʻtmas, 16 fevral kuni Xitoy kompaniyasi bilan Oʻzbekistonda umumiy quvvati 2000 MVt boʻlgan quyosh fotoelektr stansiyalarini qurish boʻyicha memorandum imzolash marosimida energetika vazirining sobiq oʻrinbosari Sherzod Xoʻjayev ham ishtirok etdi. 

Shunda Sherzod Xoʻjayev hozirda Energetika vazirligida qayta tiklanuvchi energiya manbalari boʻyicha loyiha ofisi direktori lavozimida faoliyat yuritayotgani maʼlum boʻlgan. 

Ishdan qattiq tanqidlar bilan quvilib, keyin yana hammaning esidan chiqqach, yangi lavozimga oʻtirib olish bizda odatiy holga aylanyapti. Bu roʻyxatni esa yana davom ettirish mumkin. Shu yerda qiziq savol tugʻiladi, qattiq tanqidlar bilan ishdan olinish va imi-jimida lavozimga oʻtirib olish orqali kim kimni aldayapti?!