"Green Card 2027" rasman ochiladi

AQShning Kaliforniya shtatidagi federal sud Davlat departamentini 2027-yil uchun Green Card lotereyasini qayta ochishga majbur qildi. Bu haqda Courthouse News Service xabar berdi.

San-Diyego shahridagi AQSh okrug sudi sudyasi Jinsuk Ohta 14-oktyabr kuni dasturni qayta tiklashni talab qiluvchi dastlabki sud qarorini chiqardi. Unga ko‘ra, AQSh Davlat departamenti arizalarni qabul qilish boshlanadigan va tugaydigan sanalarni, ariza topshirish veb-saytini hamda ishtirok etish shartlarini e’lon qilishi lozim.

Sud ro‘yxatdan o‘tish davri kamida 30 kun davom etishi kerakligini ham belgiladi.

Green Card lotereyasi nega qayta tiklanmoqda?

AQSh ma’muriyati joriy yil uchun lotereyaga ro‘yxatdan o‘tishni belgilangan vaqtda boshlamagan. Keyinchalik hukumat arizalarni qabul qilishni boshlash uchun kech bo‘lganini bildirgan.

Shundan so‘ng Kaliforniyadagi Red Eagle Law yuridik firmasi Davlat kotibi Marko Rubioga qarshi sudga murojaat qilib, dasturni qayta ochishni talab qildi.

Sud qaroridan keyin Davlat departamentiga ro‘yxatdan o‘tish muddatlarini ochiq e’lon qilish va belgilangan davrda kelib tushgan elektron arizalarni qabul qilish majburiyati yuklatildi. Bunda arizachilar dastur talablari va hujjatlarga oid shartlarga javob berishi kerak.

2027-yilgi lotereya bo‘yicha qanday muddatlar belgilangan?

Bloomberg Law nashrining 15-oktyabrdagi xabariga ko‘ra, sud Davlat departamentidan lotereyani 18-oktyabrga qadar ochishni, arizalarni qabul qilish davrini esa 19-noyabrgacha davom ettirishni talab qilgan.

Dastur AQShga immigratsiya darajasi tarixan past bo‘lgan mamlakatlar fuqarolariga doimiy yashash huquqini olish uchun imkoniyat yaratadi. Lotereya orqali yiliga 55 ming nafargacha shaxs viza olishi mumkin.

Muallif: Hasanboy OCHUN