Germaniya sovet davridagi koʻcha nomlaridan voz kechadi

Germaniyada SSSR va GDR davri arboblari nomi bilan atalgan oʻndan ortiq koʻchalar qayta nomlanishi mumkin. Bundestagning qatagʻon qurbonlari ishlari boʻyicha vakili Evelin Supke Bild nashriga bergan bayonotida bu kabi nomlar zamonaviy Germaniya qadriyatlariga mos kelmasligini taʼkidladi.

Bild’ning yozishicha, baʼzi hududlarda sovet davri bilan bogʻliq boshqa nomlar ham saqlanib qolgan. Masalan, Erfurtda “8 mart LPX” koʻchasi, Sandersdorf-Brenada esa sotsialistik mehnat rekordlari sharafiga nomlangan koʻcha bor. Saksoniya-Anxaltning Vayssenfels-Borau tumanida esa Lenin, Germaniya–Sovet doʻstligi va Vilgelm Pik koʻchalari bir nuqtada kesishadi.

Mahalliy hokimiyatlar nomlarni oʻzgartirishga tayyorligini bildirgan boʻlsa-da, qaror aholi roziligi bilan qabul qilinishi kutilmoqda. Yerixov jamoasida Lenin, Pik va Ernst Telman nomli koʻchalarni oʻzgartirish rejalari keskin bahsga sabab boʻlgan. “Germaniya uchun muqobil” partiyasi bugungacha qarshilik bildirmoqda. Masala hatto oliy maʼmuriy sudgacha yetib borib, yakuniy qaror 26 yanvarda chiqarilishi rejalashtirilgan.

Aholi orasida manzil oʻzgarishi bilan bogʻliq byurokratik jarayonlardan xavotir kuchli. Baʼzi shaharlarda esa masala kun tartibiga ham qoʻyilmagan — Nauyenda hokimiyat hali bu boʻyicha biror taklif kelib tushmaganini maʼlum qilgan.

Maʼlumot uchun, Ikkinchi jahon urushida keyin Germaniya GFR va GDRga boʻlingan, Sharqiy Germaniya SSR taʼsirida shakllangan edi. 1990 yil 3 oktabrda mamlakat rasman birlashgan.