AQShning F-16 qiruvchi samolyoti Germaniyadagi aviabazada halokatga uchradi

AQShga tegishli F-16 qiruvchi samolyoti Germaniya g‘arbida joylashgan Spangdahlem harbiy-havo bazasi yaqinida seshanba kuni halokatga uchradi. Bu haqda AQSh harbiylari ma’lum qildi.

Hodisa oqibatida samolyotda bo‘lgan bir nafar uchuvchi katapulta orqali xavfsiz chiqib ulgurgan. Uchuvchi tibbiy yordam olish uchun shifoxonaga olib ketilgan.

Harbiylar ma’lumotiga ko‘ra, halokat sabablari hozircha noma’lum. Hodisa joyida favqulodda vaziyatlarga javob berish xizmatlari ish olib bormoqda.

Ma’lum qilinishicha, F-16 samolyoti to‘rtta qiruvchi samolyot ishtirokidagi rejali o‘quv parvozidan so‘ng Spangdahlem aviabazasiga qaytib kelayotgan bo‘lgan.

Qolgan uchta F-16 samolyoti Ramstein aviabazasiga yo‘naltirilgan va u yerga xavfsiz qo‘ngan.

Hodisa yuzasidan tekshiruv boshlangan.

Muallif: Hasanboy OCHUN