Ilon Mask Trampning asosiy qonun loyihasini "jirkanch razolat" deb atadi

"Kechirasiz, lekin men endi bunga chiday olmayman. Bu ulkan, gʻazablantiruvchi, "choʻchqa goʻshti"ga toʻla xarajatlar toʻgʻrisidagi qonun loyihasi — bu jirkanch razolatdir. Bu qonun uchun ovoz berganlarga uyat boʻlsin: siz notoʻgʻri ish qilganingizni juda yaxshi bilasiz", degan u.

Maʼlumot uchun, AQSh siyosiy jargonida "choʻchqa goʻshti" ("pork", "pork barrel") atamasi siyosatchilar tomonidan tor guruhlar, biznes doiralari yoki oʻz manfaatlari yoʻlida lobbi qilingan byudjet mablagʻlarini anglatadi.

Tramp va Oq uy tomonidan "Bitta Ulkan Goʻzal Qonun" deb atalgan bu qonun loyihasi 2025 yil may oyida Vakillar palatasi tomonidan qabul qilindi, va iyun oyida AQSh Senatida tasdiqlanishi kutilmoqda.

Ilon Mask oʻzining bir nechta postlarida bu qonun loyihasi AQShning allaqachon ulkan boʻlgan byudjet taqchilligini 2,5 trillion dollarga yetkazishini va fuqarolar zimmasiga katta qarz yukini orttirishini taʼkidladi.

Yana bir muhim fakt — dunyodagi eng badavlat inson Ilon Mask Trampning saylovoldi kampaniyasiga 250 million dollardan ortiq mablagʻ sarflagan. Shuningdek, u Oq uyda norasmiy tarzda Davlat samaradorligi departamenti (DOGE) deb atalgan yangi boʻlimni boshqargan va byudjet xarajatlarini qisqartirish bilan shugʻullangan.