Sadir Japarov O‘zbekiston Bosh vaziri Abdulla Aripovni qabul qildi

Prezident Sadir Japarov 22-iyun kuni Cho‘lponota shahrida O‘zbekiston Bosh vaziri Abdulla Aripovni qabul qildi. Bu haqda Akipress nashri xabar berdi.

Uchrashuv davomida ikki tomonlama kun tartibidagi masalalar yuzasidan fikr almashildi, shuningdek, siyosiy va iqtisodiy hamkorlikka alohida e’tibor qaratildi.

Japarov mamlakatlar o‘rtasidagi strategik sheriklik rivojlanib borayotganini ta’kidlab, 23-iyunga belgilangan Hukumatlararo komissiya yig‘ilishi ikki tomonlama hamkorlikning ustuvor yo‘nalishlarini ilgari surishda muhim qadam bo‘lishiga ishonch bildirdi.

Aripov Qirg‘iziston Prezidentiga samimiy qabul uchun minnatdorlik izhor etib, Shavkat Mirziyoyevning salomi va ezgu tilaklarini yetkazdi.

O‘zbekiston Bosh vaziri ikki mamlakat yetakchilari o‘rtasida oliy darajada erishilgan kelishuvlarni amaliy ro‘yobga chiqarish yo‘lida barcha sa’y-harakatlarni ishga solishga tayyorligini ma’lum qildi.

Uchrashuv yakunida Prezident Sadir Japarov va O‘zbekiston Bosh vaziri Abdulla Aripov ikki mamlakat xalqlarining farovonligi hamda Markaziy Osiyoning barqaror rivojlanishi yo‘lida qirg‘iz-o‘zbek munosabatlarini do‘stlik, yaxshi qo‘shnichilik va strategik sheriklik ruhida birgalikdagi sa’y-harakatlar bilan yanada mustahkamlashga tayyor ekanliklarini ta’kidladilar.