London sudi “Vagner” bilan hamkorlik qilgan britaniyaliklarga hukm chiqardi

London sudi 20–23 yoshli olti nafar britaniya fuqarosini 7 yildan 17 yilgacha ozodlikdan mahrum qilish jazosi bilan hukm qildi. Ular 2024 yil mart oyida Rossiyaning terroristik tashkilot deb eʼtirof etilgan “Vagner” xususiy harbiy kompaniyasi topshirigʻi bilan sharqiy Londondagi omborni yoqib yuborgan. Omborda Ukrainaga yuboriladigan texnika saqlangan boʻlib, zararning miqdori qariyb 1,5 mln yevroni tashkil etdi.

Asosiy tashkilotchi 21 yoshli Dilan Erl 17 yilga qamaldi. Uning sheriklari Jeyk Rivz 12 yil, Nii Mensax 9 yil, Jakim Rouz 8 yil, Ugnius Asmena 7 yil, Eshton Evans esa 9 yilga ozodlikdan mahrum qilindi.

Tergovga koʻra, “Vagner” ularga vaʼda qilingan pullarni bermaganidan soʻng, guruh hatto Londonda yashovchi rossiyalik tadbirkor Yevgeniy Chichvarkinni oʻgʻirlashni rejalashtirgan. Biroq politsiya ularni vaqtida qoʻlga oldi.

“Vagner” xususiy harbiy kompaniyasi 2014 yilda Rossiyada paydo boʻlib, Ukraina sharqidagi harbiy harakatlarda faol qatnashgan. Keyinchalik Suriya, Liviya, Markaziy Afrika Respublikasi va boshqa mamlakatlarda ham ishtirok etgani maʼlum. 

Gʻarb davlatlari va BMT “Vagner”ni koʻplab noqonuniy operatsiyalar, inson huquqlarini buzish va jinoyatlarda ayblab keladi. 2023 yilda Yevropa Ittifoqi va Buyuk Britaniya uni terroristik tashkilot sifatida tan oldi.