Starmer ketdi. Britaniya yana bosh vazir izlayapti

Ikki yil oldin u katta umid bilan keldi. 14 yillik Konservatorlar hukumati mamlakatni charchatib ketgandi — Breksit, pandemiya mojatolari, bir-birini quvib o'zgarayotgan bosh vazirlar. Starmer barqarorlik va'dasi bilan saylovga kirdi. Leyboristlar tarixiy g'alaba qozondi.

Lekin ikki yil — Britaniya siyosatida abadiylik.

Iqtisod tuzalmadi. Kasalxonalar, maktablar o'sha ahvolda qoldi. Odamlar va'dalarni esladi, natijalarni kutdi — natija ko'rinmadi. Reyting yil sayin eriy bordi. Keyin Epshteyn fayllari keldi.

Epshteyn — Amerikaning boyavoy moliyachisi, o'nlab voyaga etmagan qizlarni istismor qilgani uchun sudlangan, 2019 yilda qamoqxonada halok bo'lgan odam. Uning shaxsiy arxivi ommaga chiqarilgach, jahon siyosati silkinib ketdi — chunki u hamma bilan do'st bo'lgan: prezidentlar, shahzodalar, vazirlar.

Britaniyadan Piter Mandelson — Leyborist partiyasining eski tulpori. O'zi tajribali, uddaburon, Tramp ma'muriyati bilan til topishadi degan umidda Starmer uni AQSh elchisi qilib yubordi. Fayllar chiqgach ma'lum bo'ldiki, Mandelson Epshteynni "eng yaxshi do'stim" deb atagan, u sudlanganida "kurash, tez chiqib ket" deb xat yozgan, hatto davlat sirlarini unga oshirib turgan. Starmer Mandelsonni ishdan oldi — ammo uni umuman tayinlaganligi uchun baho to'ladi.

Ustiga ustak, mahalliy saylovlar fojia bilan tugadi. Partiya ichida norozilik kuchaydi. So'ng Endi Bernham sahnaga chiqdi.

Bernham — Manchester shahrini to'qqiz yil boshqargan odam. Shimolni — Britaniyaning kambag'alroq, eski sanoat mintaqasini — tiklashga umr bag'ishladi. Oddiy odamlar uni yaxshi ko'radi, "Shimol qiroli" deyishadi. U parlamentga qaytish uchun qo'shimcha saylovga tushdi — va g'alaba qozondi. Bu Starmerga ochiq musobaqa e'loni edi.

Bernham dushanba kuni parlamentda deputatlik qasamini ichdi. Starmer esa o'sha tongda iste'fosini e'lon qildi. Sobiq raqibi Ues Striting ham Bernhamni qo'llashini aytdi. Ya'ni — toj berish rasmiyatchilik, musobaqa bo'lmaydi degan umid bor.

Bernham sentyabrgacha yangi bosh vazir bo'lishi kutilmoqda.

Britaniya siyosati shunday — o'n yil ichida mana shu yettinchi bosh vazir. Tizim har safar odamni ezadi, keyin yangi umid izlaydi. Bernham o'sha umid. Lekin mikroskop tagida ish boshlanadi — va u ham o'sha mikroskop tagida.