Mas’ud Pezeshkiyon iste’foga chiqmoqchi(mi?)

31-dekabr kuni Buyuk Britaniyada joylashgan muxolif “Iran International” nashri noma’lum manbaga tayanib, Eron prezidenti Mas’ud Pezeshkiyon Oliy Rahbar devoniga iste’foga chiqish haqida rasmiy ariza topshirdi, deb xabar berdi.

Manbaning so‘zlariga ko‘ra, yakshanba kuni yuborilgan maktubda Pezeshkiyon prezident va hukumat mamlakatdagi yirik va muhim qarorlar qabul qilish jarayonlaridan amalda chetlatilganini, natijada yuzaga kelgan bo‘shliq orqali Islom inqilobi posbonlari korpusi ichidagi qat’iy siyosat tarafdorlari vaziyatni o‘z nazoratiga olganini ta’kidlagan.

Pezeshkiyon bunday sharoitda hukumatni boshqarolmasligini va qonuniy majburiyatlarini bajarolmasligini, shu sababli zudlik bilan iste’foga chiqishga ruxsat so‘ragan.

Maktub mazmuni hokimiyatning eng yuqori doiralarida muqaddam kuzatilmagan bo‘linish mavjudligidan dalolat beradi.

“Iran International” avvalroq Islom inqilobi posbonlari korpusi prezidentning ko‘plab vakolatlarini bosqichma-bosqich cheklab, hukumatning muhim qismlari ustidan amalda nazorat o‘rnatgani haqida xabar bergan.

Yuzaga kelgan vaziyat Pezeshkiyon ma’muriyatini siyosiy va ijroiy boshi berk ko‘chaga kiritib qo‘ygan.

Tasnim xabarni rad etdi

Eron ommaviy axborot vositalari Mas’ud Pezeshkiyon Eron Oliy rahnamosining o‘g‘li Mujtaba Xomanaiy idorasiga iste’foga chiqish haqida ariza topshirganini “yolg‘on” deb atab, zudlik bilan raddiya berdi.

Yarim rasmiy “Tasnim” axborot agentligi hukumatdagi manbasiga tayanib, “prezident iste’foga chiqmadi va bugun o‘z vazifalarini sidqidildan bajardi” deya ma’lum qildi va “uning keyingi ish jadvali odatdagidek davom etishini” bildirdi.

“Tasnim” shuningdek, “Iran International” telekanali Isroilning “Mossad” razvedka agentligi bilan aloqador ekanligini iddao qildi. Biroq Eron rahbariyatidagi ziddiyatlar ommaviy axborot vositalarida bir necha bor yuzaga qalqib chiqdi.

Muxolifatchilar, Isroil va G‘arb manbalariga ko‘ra, qat’iy siyosat tarafdori bo‘lgan Islom inqilobi posbonlari korpusi AQSH bilan diplomatik muzokaralar hamda mamlakat ichidagi noroziliklarni bostirishni amalda o‘z nazoratiga olgan va sobiq oliy rahbar Ali Xomanaiyning o‘ldirilishi ortidan jarohatlangan Mojtaba Xomanaiyning o‘rnini egallagan.

“Iran International” nashrining qo‘shimcha qilishicha, Pezeshkiyon faqat nomigagina prezident bo‘lib, deyarli hech qanday real hokimiyatga ega emas va hatto o‘z vazirlar mahkamasini shakllantirishga ham qiynalmoqda.

Pezeshkiyon mavhum bayonot berdi

Pezeshkiyon esa iste’foni tasdiqlamasdan yoki inkor etmasdan, rasmiy ijtimoiy tarmoqlarda mavhum so‘zlar bilan chiqish qildi.

U X sahifasida shunday deb yozdi:

“Katta qiyinchiliklarga bardosh bermay turib, ularga qarshi kurashib bo‘lmaydi. Bu o‘nqir-cho‘nqir yo‘ldan faqat jamoatchilik xabardorligi va hamkorligi bilangina o‘tish mumkin”.

“Biz jamiyatning barcha qatlamlari muammolarni hal qilishda ishtirok etishi uchun xalqqa mavjud voqelikni aniq-ravshan tushuntirishimiz kerak”, — deya qo‘shimcha qilgan Eron prezidenti.

Muallif: Isomiddin Jumanazarov