Масъуд Пезешкиён истеъфога чиқмоқчи(ми?)

31 декабрь куни Буюк Британияда жойлашган мухолиф “Iran International” нашри номаълум манбага таяниб, Эрон президенти Масъуд Пезешкиён Олий Раҳбар девонига истеъфога чиқиш ҳақида расмий ариза топширди, деб хабар берди.

Манбанинг сўзларига кўра, якшанба куни юборилган мактубда Пезешкиён президент ва ҳукумат мамлакатдаги йирик ва муҳим қарорлар қабул қилиш жараёнларидан амалда четлатилганини, натижада юзага келган бўшлиқ орқали Ислом инқилоби посбонлари корпуси ичидаги қатъий сиёсат тарафдорлари вазиятни ўз назоратига олганини таъкидлаган.

Пезешкиён бундай шароитда ҳукуматни бошқаролмаслигини ва қонуний мажбуриятларини бажаролмаслигини, шу сабабли зудлик билан истеъфога чиқишга рухсат сўраган.

Мактуб мазмуни ҳокимиятнинг энг юқори доираларида муқаддам кузатилмаган бўлиниш мавжудлигидан далолат беради.

“Iran International” аввалроқ Ислом инқилоби посбонлари корпуси президентнинг кўплаб ваколатларини босқичма-босқич чеклаб, ҳукуматнинг муҳим қисмлари устидан амалда назорат ўрнатгани ҳақида хабар берган.

Юзага келган вазият Пезешкиён маъмуриятини сиёсий ва ижроий боши берк кўчага киритиб қўйган.

Tasnim хабарни рад этди

Эрон оммавий ахборот воситалари Масъуд Пезешкиён Эрон Олий раҳнамосининг ўғли Мужтаба Хоманаий идорасига истеъфога чиқиш ҳақида ариза топширганини “ёлғон” деб атаб, зудлик билан раддия берди.

Ярим расмий “Tasnim” ахборот агентлиги ҳукуматдаги манбасига таяниб, “президент истеъфога чиқмади ва бугун ўз вазифаларини сидқидилдан бажарди” дея маълум қилди ва “унинг кейинги иш жадвали одатдагидек давом этишини” билдирди.

“Tasnim” шунингдек, “Iran International” телеканали Исроилнинг “Mossad” разведка агентлиги билан алоқадор эканлигини иддао қилди. Бироқ Эрон раҳбариятидаги зиддиятлар оммавий ахборот воситаларида бир неча бор юзага қалқиб чиқди.

Мухолифатчилар, Исроил ва Ғарб манбаларига кўра, қатъий сиёсат тарафдори бўлган Ислом инқилоби посбонлари корпуси АҚШ билан дипломатик музокаралар ҳамда мамлакат ичидаги норозиликларни бостиришни амалда ўз назоратига олган ва собиқ олий раҳбар Али Хоманаийнинг ўлдирилиши ортидан жароҳатланган Можтаба Хоманаийнинг ўрнини эгаллаган.

“Iran International” нашрининг қўшимча қилишича, Пезешкиён фақат номигагина президент бўлиб, деярли ҳеч қандай реал ҳокимиятга эга эмас ва ҳатто ўз вазирлар маҳкамасини шакллантиришга ҳам қийналмоқда.

Пезешкиён мавҳум баёнот берди

Пезешкиён эса истеъфони тасдиқламасдан ёки инкор этмасдан, расмий ижтимоий тармоқларда мавҳум сўзлар билан чиқиш қилди.

У Х саҳифасида шундай деб ёзди:

“Катта қийинчиликларга бардош бермай туриб, уларга қарши курашиб бўлмайди. Бу ўнқир-чўнқир йўлдан фақат жамоатчилик хабардорлиги ва ҳамкорлиги билангина ўтиш мумкин”.

“Биз жамиятнинг барча қатламлари муаммоларни ҳал қилишда иштирок этиши учун халққа мавжуд воқеликни аниқ-равшан тушунтиришимиз керак”, — дея қўшимча қилган Эрон президенти.

Муаллиф: Исомиддин Жуманазаров