Trampning iqtisodiy izolyatsiyasi AQSHga “navbatdagi mag‘lubiyatni” olib keladi – Abbos Aroqchi

Eron tashqi ishlar vaziri Abbos Aroqchining 20-avgust kuni aytishicha, AQSh prezidenti Donald Trampning Tehronga qarshi e’lon qilgan yangi “Iqtisodiy D-kuni” kampaniyasi Vashingtonga yana bir mag‘lubiyat keltirib, eronliklarning AQShga nisbatan nafratini kuchaytiradi.

“Iqtisodiy D-kuni” deb atalayotgan narsa Amerikaning o‘z inqirozidan – misli ko‘rilmagan qarz va oshib borayotgan foiz xarajatlaridan chalg‘itishga urinishdir. Muvaffaqiyatsiz siyosatni yanada kuchaytirish navbatdagi mag‘lubiyat va eronliklarning adovatiga sabab bo‘ladi”, – deb yozdi Aroqchi X ijtimoiy tarmog‘ida.

Shuningdek, AQSHning “iqtisodiy terrorizm” deb atagan harakatlari jahon iqtisodiyoti hamda butun dunyo suverenitetiga tahdid solayotganini qo‘shimcha qildi.

Uning bu so‘zlari Tramp 19-avgust kuni yangi chorasini “misli ko‘rilmagan ko‘lamdagi iqtisodiy urush va izolyatsiya” deb atab, uni biror bir mamlakatga qarshi amalga oshirilgan eng kuchli iqtisodiy operatsiya deya ta’riflaganidan so‘ng yangradi.

“Biron-bir mamlakat moliya muassasalari, korxonalari, aeroportlari yoki davlat idoralariga Eronni qandaydir shaklda qo‘llab-quvvatlashga ruxsat bersa, o‘sha davlat ham qaqshatqich iqtisodiy oqibatlarga duchor bo‘ladi”, — dedi Tramp.

Tramp ushbu kampaniyani “Iqtisodiy D-kuni” deb atab, AQSH ittifoqchilarini ham Eronni yakkalashda Vashingtonga qo‘shilishga undadi.