Isroilning 2 nafar vaziriga Irlandiyaga kirish taqiqlandi

Juma kuni Irlandiya Isroil Milliy xavfsizlik vaziri Itamar Ben Gvir va Moliya vaziri Bezalel Smotrichning mamlakatga kirishini taqiqlaganini e’lon qildi hamda ularning falastinlik faollarga nisbatan munosabatini qoraladi.

O‘ta o‘ngchi vazir Ben Gvir o‘tgan oy G‘azoga yo‘l olgan gumanitar yordam kemalarida Isroil askarlari tomonidan qo‘lga olingan faollarni masxara qilgandi. O‘shanda Irlandiya Bosh vaziri Maykl Martin G‘azodagi mojaroni kuchaytirishda ayblanadigan Isroil rasmiylariga nisbatan mamlakatga kirishini cheklash chorasi ko‘rilishini aytgandi.

Ben Gvir 2022-yilda Bezalel Smotrichning o‘ta o‘ngchi “Diniy Sionizm” partiyasi bilan tuzgan ittifoqi qonunchilik saylovlarida uchinchi o‘rinni egallaganidan so‘ng vazir bo‘ldi.

Ben Gvir va Smotrich birgalikda Isroil Bosh vaziri Binyamin Netanyahu o‘ng qanot koalitsion hukumatining asosiy tayanchlari hisoblanadi.

“Ikki vazirning nafaqat kemalar bilan bog‘liq voqeasi, balki doimiy bayonotlari va xatti-harakatlari ham mohiyatan falastinliklarning Falastindan yo‘q qilish istagini anglatadi”, — dedi Martin juma kuni Chernogoriyadagi sammit chog‘ida jurnalistlarga.

Uning fikricha, bu xatti-harakatlar Yevropa Ittifoqi darajasida ham sanksiyalar qo‘llanilishiga asos bo‘la oladi.

O‘tgan oyda Fransiya ham Ben Gvirning mamlakatga kirishini taqiqlagandi. 2025-yilning iyun oyida Buyuk Britaniya bu ikki shaxsga mamlakatga kirishni man etgan, keyinroq Ispaniya va Sloveniya kabi boshqa davlatlar ham shu amalni bajargan.

Irlandiya HAMASning 2023-yil oktyabr oyida Isroilga uyushtirgan qonli hujumidan so‘ng Isroilning G‘azoni bombardimon qilishini keskin tanqid qilgan davlatlardan biridir. Mamalakat 2024-yilda Falastin davlatini tan oldi.

Ko‘p o‘tmay, Isroil tashqi ishlar vaziri Gideon Saar Irlandiyani “Isroilga qarshi keskin siyosat yuritishda” ayblab, mamlakatning Dublindagi elchixonasini yopishga buyruq bergandi.