Tramp musulmonlarni Ramazon bilan tabrikladi

Oq uy 17 fevral kuni Islomning eng muqaddas oyi boshlanishi munosabati bilan bayonot eʼlon qildi.

Tramp tabrik nutqini: “Bugun Ramazonni nishonlayotgan barcha insonlarga samimiy salom va ezgu tilaklarimni yoʻllayman”, – deb boshlagan.

Tramp millionlab amerikalik musulmonlar Ramazonni ibodat va roʻza orqali oʻtkazishini taʼkidladi. Shuningdek, bu oy oilaviy va jamoat aloqalarini mustahkamlashi, rahmdillik, saxovat, shafqat va kamtarlik kabi qadriyatlarni tasdiqlashini qayd etdi.

Prezident oʻz maʼmuriyatining diniy erkinlikni himoya qilishdagi sodiqligiga alohida urgʻu berib: “Xudo tomonidan inʼom etilgan emin-erkin ibodat qilish huquqi millatimizning farqlovchi belgisi, farovonligimiz va qudratimizning asosiy ustuni hisoblanadi. Shu sababli har kuni mening maʼmuriyatim barcha fuqarolarning oʻz eʼtiqodini amalga oshirishi, vijdoniga amal qilishi va erkin ibodat qilishini taʼminlamoqda", dedi tabrik bayonotida.

Tabrik tinchlik va hamjihatlik uchun qilingan tilaklar bilan yakunlangan:

“Ushbu marhamat va ezgulik mavsumi paytida men oilalarga baxt-saodat, butun dunyoga birdamlik va tinchlik hamda kelayotgan yilda baraka va farovonlik tilab duo qilaman”.