Zelenskiy: Putin maqsadiga erisholmadi, biz Ukrainani saqlab qoldik

Volodimir Zelenskiy urush boshlanganining toʻrt yilligiga bagʻishlangan murojaatida Ukraina Rossiya bosqinidan buyon oʻz mustaqilligini himoya qilib kelayotganini, tinchlikka erishish yoʻlida xalqi bergan qurbonliklarga xiyonat qilmasligini taʼkidladi.

“Putin oʻz maqsadlariga erisha olmadi. U Ukraina xalqini sindirolmadi. U bu urushda gʻalaba qozonmadi”, — dedi Zelenskiy seshanba kuni.

“Biz Ukrainani saqlab qoldik. Bundan keyin ham tinchlikka erishish hamda adolatni taʼminlash uchun qoʻlimizdan kelgan barcha ishni qilamiz”.

Kiyevda Rossiyaning 2022 yil 24 fevraldagi keng koʻlamli bosqinining toʻrt yilligiga bagʻishlangan marosim boʻlib oʻtdi.

Unga Ukrainaning ittifoqchilaridan yuqori martabali mehmonlar, jumladan, Yevrokomissiya raisi Ursula fon der Lyayen qatnashdi.

Ikkinchi jahon urushidan keyin Yevropadagi eng qonli mojaro boʻlgan bu toʻqnashuvda har ikki tomondan yuz minglab askarlar halok boʻldi yoki yaralandi.

Asosiy vayronkorlik Ukraina hududiga toʻgʻri keladi. Rossiya kuchlari oʻn minglab tinch aholini oʻldirdi. Raketa hamda dron zarbalari bilan Ukraina shaharlarini barbod qildi.

Qoʻshma Shtatlar vositachiligidagi Rossiya bilan tinchlik muzokaralari hudud masalasidagi kelishmovchilik tufayli toʻxtab qoldi.

Jang maydonida toshbaqadek sekin harakat qilayotgan Moskva sharqiy Donetskning qolgan 20 foizini ham soʻramoqda.

Kiyev esa minglab odamlari jonini fido qilib himoya qilgan yerlarining bir qarichidan ham voz kechmasligini qatʼiy taʼkidladi.

Zelenskiy oʻz murojaatida hukumati mustahkam, munosib va barqaror tinchlik istashini bildirdi.

U Ukraina nomidan tinchlik muzokarachilariga aytgan gaplarini eslatdi: “Shuncha yillik mehnatingizni yoʻqqa chiqarmang. Ukraina boshidan oʻtkazgan barcha kurashlarni, jasoratni, qadr-qimmatni – hammasini qadrsizlantirmang. Biz bularni qoʻldan chiqarmaymiz, unutmaymiz va unga xiyonat qilmaymiz”.

Zelenskiy nutqi soʻngida ular tarixdagi eng ogʻir qishdan oʻtayotgani, shuningdek, kelajakdagi Ukraina uchun qadam-baqadam, vazifama-vazifa, yutuqma-yutuq harakat qilayotgani va buning barchasi butun Ukraina xalqining xizmati ekanini aytib oʻtdi.